O xulgado de instrución número 3 de Ourense, en funcións de garda, decretou este xoves o ingreso en prisión provisional comunicada —eludible con fianza— para o home detido en relación ao tiroteo a un brigadista ocorrido en 2008, por un delito de asasinato en grao de tentativa.
O xulgado impuxo ao detido unha fianza de 50.000 euros e a prohibición de abandonar o territorio español, así como de aproximarse ou comunicarse coa vítima no caso de que saia de prisión.
A Garda Civil rexistrou este mércores varias propiedades vinculadas a J.M.M.C., un alpendre e unha leira anexas á vivenda da parroquia de Amendo, en Taboadela, onde en 2009 foron atopados mortos a tiros os seus pais, un crime que ocorreu meses despois do tiroteo ao brigadista e polo que el foi detido e posto en liberdade en dúas ocasións.
O arresto de J.M.M.C. produciuse este martes, para investigar a súa posible relación co tiroteo a un brigadista ocorrido en Xunqueira de Ambía en setembro de 2008, e cuxos casquillos poderían vinculalo ao crime de Taboadela.
O brigadista, que traballaba co detido no servizo de extinción de incendios da Xunta, regresaba en coche ao seu domicilio en setembro de 2008, logo de estar traballando coa brigada de Xinzo de Limia ata as 4.00 horas. O home observou que a vía estaba obstaculizada por ramaxes e, ao apearse para retiralas, un individuo coa cara tapada realizou varios disparos.
Debido ás lesións causadas polas balas, foi sometido a unha intervención cirúrxica urxente para practicarlle unha nefrectomía, de forma que se lle extirpou o ril esquerdo, que estaba gravemente danado por unha das balas.
