A Garda Civil detivo un home de 47 anos como presunto autor dun delito contra a saúde pública, dentro dunha operación contra o tráfico de drogas a pequena escala na localidade de Tui.
Con esta operación, a Garda Civil destaca que se desarticulou "un importante punto de venda de drogas a pequena escala", que estaba a ser distribuída a mozas da comarca e do norte de Portugal.
Por mor das pescudas levadas a cabo polo Equipo de Investigación da Garda Civil de Tui conseguiuse localizar unha vivenda no centro urbano da localidade que estaba a ser frecuentada por coñecidos "consumidores habituais da zona", segundo a Benemérita.
"Estes mozos entraban na vivenda, permanecían escasos minutos no seu interior e tras ser identificados intervíñanselles pequenas cantidades de estupefacientes", engade.
Por mor das investigacións realizadas e unha vez confirmadas as sospeitas que recaían sobre a persoa que residía neste domicilio, foi localizado e interceptado polos compoñentes do Equipo de Investigación cando camiñaba por unha céntrica rúa de Tui, próxima ao seu domicilio.
Ao ser abordado pola Garda Civil interviñéronselle 20 gramos de heroína distribuída en catro envoltorios e 865 euros en efectivo que levaba no interior dun libro que portaba na man. Foi detido por un suposto delito de tráfico de estupefacientes.
Instantes logo do seu arresto, o detido fixo entrega voluntaria dunha báscula de precisión e unha pistola do calibre 6,35 milímetros, que gardaba no seu domicilio.
Ao facer entrega da arma, segundo a Garda Civil, púidose comprobar que estaba alimentada cun cartucho na recámara e tiña outro no cargador. O detido, xunto coas dilixencias instruídas e os efectos incautados, foi posto este venres a disposición do Xulgado de Instrución número 2 de Tui, que decretou o seu ingreso preventivo en prisión.
