O Colexio de Procuradores de Santiago decidiu eximir aos seus colexiados do pago da cota fixa do mes de abril polo "importante dano económico" derivado da folga que rexistra a xustiza galega desde o pasado día 7 de febreiro.
Nun comunicado remitido aos medios este luns, o decano dos procuradores da capital galega, Fernando González Concheiro asegura que os procuradores "sofren moito" as consecuencias deste paro polo que a xunta de goberno do colexio aprobou de forma unánime esta medida.
Segundo explicou, máis de 100 profesionais están colexiados actualmente en Santiago e realizan cada día o seu traballo nos xulgados. "Está todo paralizado pola folga, non hai apenas actividade e o prexuízo para os despachos é moi grande", apuntou o decano.
Así, recorda que unha situación deste tipo "sempre ten consecuencias e danos colaterais", polo que pide a pártelas "diálogo" e que se chegue a un punto de encontro". "Porque a folga prolongouse en exceso e os profesionais vinculados á actividade xudicial estamos a atravesar moitas dificultades", engade o decano.
Para rematar, incide en que os procuradores composteláns, do mesmo xeito que outros colectivos do sector, "anhelan un acordo rápido polo ben de todos". "O paro afecta á cidadanía e a un elevado número de profesionais", apuntou.
