O movemento Ceivar convocou nas sete cidades galegas concentracións este luns en resposta á detención dos membros de Resistencia Galega Antón García Matos "Toninho" e Asunción Losada Camba.
Ambos foron detidos o pasado sábado en Vigo como sospeitosos de delitos de pertenza a organización terrorista en grao de dirixente, tenencia e transporte de explosivos e falsidade documental.
"Estamos a observar por enésima vez como se lle aplica unha sorte de estado de excepción a aqueles que reivindican a independencia", recolleu o manifesto lido na compostelá Praza de Cervantes ante unhas cen persoas.
No manifesto tamén se denunciou que, "en virtude da chamada Lei Antiterrorista", os catro detidos -Toninho, Losada e dous presuntos colaboradores- "aínda non puideron contactar cos seus avogados e poderían estar incomunicados ata cinco días".
Tras a concentración, os manifestantes percorreron as rúas do Centro histórico de Santiago coreando consignas como "non son terroristas, son independentistas", "Audiencia Nacional, tribunal fascista", "Defender a terra non é delito" ou "non á Lei Antiterrorista".