Seis proxectos foron seleccionados entre 27 candidaturas para participar na primeira aceleradora da Xunta para o sector alimentario en colaboración co Clúster Alimentario de Galicia (Clusaga).
Os proxectos seleccionados -catro dos cales xa participaran nun programa de aceleración o pasado ano- accederán agora a unha plataforma de apoio integral de doce meses de duración orientada a favorecer o seu desenvolvemento.
Ademais, tamén terán á súa disposición un préstamo participativo de Xesgalicia que, segundo sinala a Xunta nun comunicado, pode levar unha opción de capitalización de ata un máximo de 250.000 euros.
O Comité de Selección de BFFood primou a innovación e tecnoloxía dos proxectos seleccionados, que teñen que atender a algún dos retos definidos pola industria alimentaria como a dixitalización e automatización, a sustentabilidade, o desenvolvemento de novos produtos, a interacción con clientes e consumidores, así como fortalecer a resiliencia do sector ante situacións de urxencia derivadas de pandemias, como a provocada polo coronavirus.
Os proxectos seleccionados son os seguintes: 'Essence Food', de Pontevedra e centrada na revaloración de excedentes; 'Monkey Markets', ferramenta B2B lanzada desde A Coruña para compravendas no mercado chinés; 'Muutech food monitoring platform', tamén de Pontevedra e orientada na monitorización de datos; 'TripleAlpha', proxecto coruñés de analítica avanzada e aprendizaxe automática; 'Refix-Atlantic Sexa Water', bebida coruñesa elaborada con auga do mar da Costa da Morte e 'Sensebit', un software de análise sensorial.
Trátase de 192 proxectos en zonas rurais de Galicia que permitirán pvomover instalacións para a xeración de enerxía térmica mediante equipamentos que utilicen a biomasa como combustible.
Segundo a Xunta, estas iniciativas permitirán mobilizar 2 millóns de euros e un aforro de 5.000 megawatios hora ao ano, así como case 0,2 millóns de euros na subministración enerxética e unha redución das emisións de 1.500 toneladas de CO2.
