A conselleira do Mar, Rosa Quintana, participou na mañá deste mércores na clausura da xornada Innovación e Valorización do Mexillón de Galicia organizada por Opmega, onde destacou a competitividade e o bo facer do sector que aumentou un 45% a súa facturación desde 2015.
A produción de mexillón aumentou un 24% nestes anos e a súa facturación un 45%, mentres que o prezo medio subiu un 15%, datos que reflicten a competitividade dos produtores galegos, explicou a conselleira.
A xornada Innovación e Valorización do Mexillón de Galicia organizada pola Organización de Produtores de Mexillón de Galicia (Opmega) busca debater e pór encima da mesa asuntos como a promoción e defensa da Denominación de Orixe Protexida (DOP), a innovación en maquinaria de procesado e o uso do TIC para a mellora da xestión da produción en bateas, os beneficios para o sector mexilloeiro da etiqueta azul sostible Marine Stewardship Council (MSC), e os métodos innovadores en detección de toxinas que se utilizan no Laboratorio CIFGA de Lugo.
Na súa intervención, Quintana destacou o "bo facer" do sector e incidiu na importancia do traballo conxunto coa Administración e cos distintos centros investigadores para seguir avanzando e mellorando os resultados da industria do mexillón, para o que é de vital importancia a seguridade xurídica das concesións tanto mitilícolas como de toda a cadea mar-industria.
Co obxectivo de continuar coa senda de crecemento, a titular de Mar animou aos representantes do sector a optar á orde de axudas publicada o pasado día 22 no Diario Oficial de Galicia para proxectos que fomenten o desenvolvemento tecnolóxico, a innovación e a competitividade no sector da acuicultura en colaboración con organismos científicos e universidades.
Trátase da primeira vez que se saca esta orde no marco do Fondo Europeo Marítimo e de Pesca (FEMP) e o prazo de solicitudes aínda non finalizou, polo que os interesados aínda poden presentar proxectos, insistiu a conselleira.
