O expresidente do Goberno, Mariano Rajoy, asegurou este sábado que o voto ao PP e, particularmente, a Pablo Casado nas eleccións xerais do 28 de abril é a "única opción real" para que haxa un cambio político en España e poder acabar co goberno da "mezcolanza". Nunha comida con afiliados e simpatizantes do Partido Popular en Mos, Rajoy sinalou que cos populares "non hai lugar a cábalas e especulacións" xa que cada voto ao seu partido é un voto "á prosperidade, á seguridade, á defensa da Constitución e ao progreso económico".
O PP, engadiu o expresidente, é a "única alternativa que existe de verdade" para impedir que os socialistas, "apoiados por independentistas e extremistas" sigan gobernando España, xa que "calquera outro voto é inútil" porque lle quita escanos ao centro dereita "e impide o cambio".
Rajoy, que recoñeceu que estas eleccións son "as máis abertas desde 1977", reiterou que existen "razóns de peso" para apoiar ao PP de Pablo Casado, ao entender que é a "garantía" da igualdade dos españois e da unidade de España, un país no que aprecia a existencia de demasiado "parlanchín e poucos bos gobernantes"
O expresidente do Goberno pediu "non esquecer" o que "sufriu" España cos anteriores gobernos do PSOE e advertiu de que "non podemos volver ás andadas" e arriscarnos a volver estar "ao bordo da quebra", unha situación que, ao seu xuízo, logrou evitar o PP "con decisións difíciles" e reformas que eran "necesarias".
España reclama, segundo Rajoy, unha política económica "solvente" para crear emprego, manter o estado do benestar e seguir "facendo reformas que nos protexan das turbulencias económicas" e todo iso, engadiu, "non o podemos pór en risco" pola "frivolidade" e a "demagoxia" dos socialistas.
O líder popular afirmou que "de nada vale" volver ao que ocorreu en España "hai 70 ou 80 anos", xa que o que necesita o país é "mirar ao futuro" e falar das cuestións que "importan de verdade" aos cidadáns como a sanidade, o benestar, as pensións, o crecemento económico ou a creación de emprego. Neste acto tamén participou a candidata do PP ao Congreso por Pontevedra, Ana Pastor, que sinalou que afronta esta campaña coa "mesma ilusión e as mesmas gañas" que tiña cando se presentou por vez primeira, acompañando ao propio Rajoy á fronte da lista electoral por Pontevedra.
Fronte aos socialistas, que "malgastan o diñeiro de todos", Pastor pediu o voto para facer presidente a Pablo Casado, "para que España progrese" e os españois gocen, entre todas cuestións, de impostos máis baixos ou dunhas pensións aseguradas.
