O expresidente do Goberno, Mariano Rajoy, recalcou este venres na súa reaparición nun acto de partido que non hai outra alternativa a un Executivo encabezado por Pedro Sánchez que o PP que agora dirixe Pablo Casado, a quen apoiou publicamente e para quen pediu o voto.
Rajoy expuxo ás mil persoas que abarrotaron o salón de actos de Afundación en Pontevedra, falando "en serio", "se alguén se cre" que hai unha alternativa ao PSOE e ás formacións que apoiaron a moción de censura na súa contra diferente ao PP. Do mesmo xeito que preguntou aos presentes se "alguén se cre que algún dos que circulan por aí vai ser presidentes do Goberno dentro dun mes", e contestou que non, porque "o único" que pode desaloxar a Sánchez da Moncloa é Pablo Casado.
Do seu sucesor á fronte do PP dixo que é "un home novo, xa curtido, con ambición e gañas", que "vai gañar as eleccións. E se non, ao tempo", remachou. Igual que prognosticou a vitoria nas catro provincias de Galicia, dado que o PP desta comunidade é "a vangarda e a retagarda do partido en España".
Rajoy recoñeceu que as do 28-A son "as eleccións máis abertas en anos" e reparou en que "hai moitísimas persoas que hoxe non teñen claro que van facer" ese día. Recomendou "non facer moito caso do que se di por aí" nas enquisas e recordou que nas dúas últimas xerais "os gurús e os pitonisos" vaticinaban un empate técnico, e rematou: "Agora imos desempatar e gañar as eleccións".
Rajoy apoiouse en que desde 2009, o PP non deixou de ser a primeira forza política en España, e confiou en que, como vén facendo, a base "de falar á xente do que lle importa e lle afecta, resolvendo os seus problemas, fuxindo da prepotencia e actuando co sentido común", conseguirao.
Reivindicou ao PP como "un gran partido, o máis grande de España", cunha historia de máis de 40 anos ás súas costas e que "prestou moitos servizos a España". Todo isto "obriga", abundou, a actuar "razoablemente e con sentido". "Non somos unha cuadrilla de afeccionados nin chegamos onte", proclamou, mentres que "hai algúns que se cren que isto é cuestión de fabricar un titular ou de subirse a un tractor. Gobernar non é fácil", remachou.
O expresidente do Goberno presumiu de xestión ao recordar que lle tocou lidar coa "peor crise" e, a pesar de todo, "non houbo rescate, nin a saída do euro", e ademais evitouse a "quebra". "Non era fácil. Gustaríame ver aí aos parlanchíns que prometen o ouro e o mouro", salientou Rajoy, quen indicou que o PP é "o antídoto para saír das crises e para evitar outras porque xa empezan a ser preocupantes algunhas cousas da economía española" e das que "ninguén fala".
FEIJÓO. O presidente da Xunta, Alberto Núñez Feijóo, encomiou a Mariano Rajoy, cuxa traxectoria utilizou para atacar, por contraposición, a Pedro Sánchez. Feijóo dixo de Rajoy que "soubo chegar ao Goberno co apoio dos españois", "soubo estar a se deber unicamente ao interese xeral" e tamén "soubo irse, cos seus principios intactos".
Mentres, proseguiu, Sánchez "chegou" a Moncloa "da man de Podemos, nacionalistas e independentistas" e logo "non estivo á altura da súa responsabilidade", porque "en lugar de gobernar para todos só o fixo para os seus socios e irase sen poder dicir que fixo algo bo para Galicia ou para o resto de España".
Feijóo valorou de Rajoy que como xefe do Executivo "defendeu a Constitución" e "nunca cedeu un milímetro á chantaxe nin tivo que chamar insistentemente a Otegi e a Batasuna-Bildu", a cuxos apoios renunciou, a diferenza de Sánchez, e "preferiu ser expresidente".
O líder dos populares de Galicia insistiu na mensaxe de que a división de voto entre as forzas de dereita "beneficiará unicamente" a Pedro Sánchez e aos seus socios, entre os que citou a Podemos e a nacionalistas e independentistas.
ANA PASTOR. A presidenta do Congreso e candidata do PP por Pontevedra, Ana Pastor, proclamou que Mariano Rajoy foi "o mellor presidente que tivo España e o PP". Pastor agradeceu ao expresidente a súa amizade e os anos que traballaron de xeito conxunto, que é a razón pola que segue "aquí, na loita", dixo, encabezando a candidatura ao Congreso por Pontevedra.
Pero, sobre todo, reivindicou o legado de Rajoy á fronte do Goberno e do PP, e resolveu: "Recoñecemos en ti á persoa que soubo unir e manter vivo o noso partido". Ana Pastor considerou "de xustiza" homenaxear en Pontevedra ao expresidente do Goberno, cuxas formas de exercer a política "moitos estrañan" e que agora "todos recoñecemos e eloxiamos", incluso quen foron os seus adversarios políticos.
Pero máis aló das formas, loou a súa "política dos resultados, da moderación e do sentido común, e da boa xestión", todo iso, engadiu parafraseando a Frank Sinatra, "ao seu xeito".
Rafael Domínguez, candidato do PP á alcaldía de Pontevedra, proclamou que o primeiro que fará cando asuma o bastón de mando será retirar o recurso contra a ampliación da licenza de actividade de Ence, e o segundo, retirar a declaración de Mariano Rajoy como persoa non grata na cidade.
