A Xunta levará a un total de 35 praias galegas a campaña de concienciación Non sexas pirata! Á praia vense a gozar, non saquear, posta en marcha entre o pasado 30 de xullo e o próximo 17 de agosto para loitar contra o marisqueo ilegal e o furtivismo 'de bañador'. A conselleira do Mar, Rosa Quintana, visitou este venres o posto da campaña na praia de Raxó, en Poio, que será un dos nove municipios da provincia que contarán con esta iniciativa.
Así, Quintana indicou que a iniciativa visitará os areais galegos que reciben "máis visitantes e que contan con maior produción marisqueira" e "coincidindo coa época de maior afluencia de turistas". Ademais, a conselleira fixo fincapé na "importancia" do marisqueo na zona, posto que os traballadores do sector representan "máis da metade dos membros" da confraría de Raxó.
O proxecto Non sexas pirata! realizará un total de 50 accións que consisten en dinámicas de xogo educativos e que, ata agora, estiveron presentes en 29 praias de 15 municipios costeiros galegos. Nos próximos días, a campaña visitará as praias do Regato e Arealonga, en Redondela —este sábado—; e as praias do Vao e Cabo Estai, en Vigo —este domingo—.
En relación co furtivismo nas praias, Rosa Quintana recordou que cada verán Gardacostas realiza entre 500 e 1.000 inspeccións nos areais galegos, nas que incluso se chegan a comisar "máis dunha tonelada" de marisco.
