O Xulgado de primeira instancia e instrución 2 de A Estrada reduciu de oito a dúas alumnos do instituto Manuel García Barros da localidade o número de investigados polo presunto pirateo das contas de correo electrónico de profesores do centro educativo.
A citada instancia xudicial arquivou as dilixencias respecto de seis alumnos ao non apreciar evidencias de que estes instalasen un sotfware que permite acceder aos contrasinais de correo electrónico e demais servizos tecleados nos computadores dos profesores nin que efectuasen entradas non consentidas aos mesmos.
Así pois, a causa continúa aberta en relación aos dous alumnos que recoñeceron os feitos.
O Xulgado acordou no auto citar ás partes acudidas, aos dous investigados e á Fiscalía o 5 de marzo.
Un investigado alega que tampouco instalou o programa espía e que accedeu a varias contas de profesores por curiosidade
Nun auto de dilixencias previas, divulgado polo Tribunal Superior de Galicia, faise constar que entre marzo e xuño de 2017 producíronse varios accesos nas contas dos profesores e no sistema de xestión do centro, o que facilitaba a obtención de datos persoais e profesionais dos titulares das mesmas.
Un dos alumnos que continúan investigados asegura que non instalou o programa pero se aproveitou desta circunstancia para facer dúas entradas, para ver se funcionaba e para consultar as notas dunha materia, pero que non accedeu a datos da vida privada de ningún profesor nin os divulgou.
O outro alega que tampouco instalou o programa espía e que accedeu a varias contas de profesores por curiosidade, pero que tampouco divulgou datos de carácter persoal.