O Helicóptero Hélimer de Salvamento Marítimo rescatou este sábado a un mergullador en apertos na praia de Razo, en Carballo (A Coruña), informou o 112 Galicia.
Foi unha persoa particular quen, preto das seis horas da tarde, solicitaba axuda para un mergullador que se atopaba entre unhas rocas na zona de Cabreira, con dificultades para saír da auga por culpa dunha intensa ondada.
Os xestores do 112 Galicia avisaron ao servizo de Salvamento Marítimo, que mobilizou ao helicóptero Helimer, e aos membros de Gardacostas de Galicia. Ademais, foron informados os axentes da Policía Local e da Garda Civil.
Finalmente, os equipos de urxencia desprazados ata o lugar do suceso confirmaron ao 112 que os socorristas puideron sacar ao home da auga. Aínda así, debido ás lesións sufridas, era necesario prestarlle asistencia médica.
Deste xeito, o equipo de rescate de Salvamento Marítimo encargouse de evacuar o mergullador a bordo da súa aeronave e trasladalo ao aeroporto de Alvedro onde, posteriormente, foi trasladado en ambulancia ata o centro hospitalario de referencia.
