O empresario Ángel Martínez Pérez 'Lito', coñecido popularmente como o 'rei das orquestras' de Galicia, volverá sentar no banco da Audiencia de Pontevedra o vindeiro martes 2 de abril, acusado de fraude fiscal.
A Fiscalía reclama que Lito sexa condenado a 35 anos de prisión e ao pago dunha multa de 13 millóns de euros por cometer dez delitos contra a Facenda pública.
Esixe tamén que devolva o diñeiro non tributado nas cotas do IVE e do IRPF, uns 4.455.443 euros entre os anos 2009 e 2012.
Este xuízo foi suspendido o pasado mes de maio por enfermidade do empresario e retomarase nos próximos días tras mellorar as súas condicións de saúde.
A pesar dese diñeiro xerado, o acusado declararía cantidades moi inferiores ás ingresadas
O fiscal sostén que o empresario é o artífice e o responsable da creación do denominado Grupo Lito, un conxunto de empresas cunha facturación anual aproximada de 25 millóns de euros que operaba no sector das actividades de produción musical e de representación artística.
A pesar dese diñeiro xerado, o acusado declararía cantidades moi inferiores ás ingresadas.
Nos catro exercicios que se inclúen neste procedemento, entre 2009 e 2012, as empresas de Lito facturarían en concepto 'festas', segundo os cálculos de Facenda, máis de 102 millóns de euros, pero nas súas declaracións só figuraron ingresos por 10,7 millóns.
