Un residente do centro de tempo libre de Patos, en Nigrán (Pontevedra), onde foron trasladados 21 usuarios sans procedentes das residencias DomusVi Cangas e Barreiro (Vigo), deu positivo por coronavirus, confirmaron a Efe fontes da Consellería de Política Social.
Esta persoa foi illada desde que presentou síntomas no propio centro e, posteriormente foi derivada ao Álvaro Cunqueiro,
Os 21 usuarios do centro de tempo libre de Patos, reconvertido en residencia pola Xunta, foron sometidos antes do seu traslado a tres probas, dúas de PCR e unha de anticorpos, e en todas deron negativo.
Fontes da Xunta consultadas por Efe non descartan ningunha hipótese sobre este contaxio nunha contorna en teoría segura, aínda que apuntan á posibilidade de que o período de incubación da enfermidade desta persoa fose máis prolongado do que se considera habitual.
A idea do traslado de residentes ao centro de Patos era salvagardalos da expansión do coronavirus nas residencias DomusVi de Cangas e Barreiro, as dúas primeiras intervidas pola Xunta debido ao elevado número de contaxios nas súas instalacións.
Segundo os últimos datos actualizados a residencia de Cangas contabiliza 94 contaxios activos entre usuarios e 17 entre traballadores, e a de Barreiro, 65 e 11, respectivamente.
A esa cifra hai que engadir os que faleceron, que en ambos os casos roldan a vintena, máis outros 21 derivados a Patos.
