A Ribeira Sacra optará finalmente á declaración de Patrimonio Mundial da Humanidade pola Unesco en 2021, despois de que sexa aprobada "por unanimidade".
Confirmouno nunha rolda de prensa o director de Belas Artes e presidente do Consello de Patrimonio Histórico, Román Fernández-Baca, quen destacou a "sustentabilidade" da zona e o traballo técnico "impecable" na presentación da candidatura por parte da Xunta.
O presidente do Consello de Patrimonio Histórico -órgano do Estado e as comunidades- deu a coñecer este venres xunto coa directora xeral de Patrimonio da Xunta, María del Carmen Insua, a elección desta candidatura para representar a España, tras o "informe positivo" do grupo de traballo.
Fernández-Baca destacou a "potente candidatura" da Ribeira Sacra, que describiu como "un dos grandes exemplos de patrimonio" de España e que abarca ás provincias de Lugo e Ourense e unha gran cantidade de construcións de ata 1.500 anos.
No que respecta a prazos, a candidatura española será presentada ante o organismo internacional en febreiro de 2020 e a inclusión avaliarase en 2021.
Xa é oficial! A Ribeira Sacra será candidata de España para ser declarada Patrimonio Mundial da @UNESCO. Unha terra cun patrimonio natural e cultural que nos representa a todos os galegos e un dos legados máis importantes que podemos conservar para as futuras xeracións pic.twitter.com/I6tmwBp0tj
— Xunta de Galicia (@Xunta) 5 de abril de 2019