A folga convocada na empresa ferroviaria Renfe polo sindicato SFF-CXT para o 14 e 15 de agosto deixará 32 trens dese operador público sen circular por Galicia.
Así o advertiu a citada organización sindical nun comunicado no que enumera os 20 trens suprimidos en Galicia, outros 10 de longo percorrido incluído con Madrid e Porto o 14 de agosto e outros 20 convois a mañá do 15 de agosto.
CXT indica que remitiu unha carta ao Ministerio de Fomento, solicitando a súa intervención nese conflito laboral alegando que pide un "aumento do nivel de contratación" do operador público ferroviario. Subliña que "a falta de cadro de persoal existente está a repercutir negativamente no servizo que Renfe está obrigado a -prestar- á cidadanía".
Engade que o ano pasado máis dun centenar de trens en Galicia "foron substituídos por autobuses por non ter maquinistas para conducilos, ocasionando serios trastornos aos viaxeiros".
Ademais, asegura que "máis de 5.200 trens de media distancia de Galicia circularon en 2018 sen persoal de intervención a bordo que atendese e informase os viaxeiros" e apunta que este ano se mantén a tendencia "con case 2.500 trens no primeiro semestre".
Eses trens, con capacidade para 180 prazas, circularon "só co maquinista", indica o sindicato e considera que Renfe, ademais de non "atender adecuadamente as incidencias que se produciron", está "a perder unha importante cantidade de diñeiro por non poder vender billetes dentro".
Tamén reprocha a política de Renfe de reducir o persoal e os horarios de venda anticipada de billetes nalgunhas estacións, nas que se incorporaron máquinas para esas transaccións.
O sindicato tamén reprocha que "cada vez máis traballos son desviados a empresas privadas por non contar Renfe co persoal suficiente" para eses labores, e sinala que hai unha "falta de mantemento que se nota no aumento de incidencias en equipos de climatización, avarías de locomotoras, redución de prestacións de confort e tracción, que provocan atrasos e supresión de trens".
Por todo iso, SFF-CXT indica que se non hai un acordo coa dirección de Renfe ou co Ministerio de Fomento, a folga podería renovarse posteriormente o 30 de agosto e o 1 de setembro.
