A Xunta de Galicia acordou este xoves cos xefes de servizo de atención primaria da área sanitaria de Vigo unha serie de medidas para mellorar o estado deste sistema e que deberán ser aplicadas nun prazo de tres meses.
Este foi o principal acordo da reunión de máis de catro horas que mantiveron esta tarde o conselleiro de Sanidade, Jesús Vázquez Almuíña, e outros altos cargos do Servizo Galego de Saúde (Sergas) con varios xefes de servizo desta zona, entre eles varios dos que decidiron dimitir hai unhas semanas en protesta pola situación existente.
Así pois, en declaracións aos medios posteriores a este encontro, Vázquez Almuíña mostrou a súa satisfacción por unha reunión que definiu como "moi exitosa" e que -manifestou" servirá para cumprir o obxectivo de tratar "de facer un novo modelo de atención primaria".
Entre as medidas comprometidas polo Goberno galego áchase principalmente a mellora da accesibilidade á atención hospitalaria dos usuarios de primaria na área de Vigo, cuestión que deberá resolverse no prazo anteriormente citado.
Así mesmo, abordáronse outros temas —precisou o conselleiro— de índole máis xeral e que, co beneplácito dos xefes de servizo, serán incorporados aos plans de traballo dos grupos de mellora constituídos pola Xunta para un novo modelo de atención primaria, aos que proximamente se incorporarán tamén os traballadores da PAC.
Vázquez Almuíña apuntou que son medidas "moi boas" e que abordan aspectos talles como a formación dos traballadores de primaria, un capítulo exclusivo de investimentos nestes centros e "novas medidas que melloren a accesibilidade" e o tempo do que dispoñen os facultativos para ver a cada paciente.
O responsable autonómico de Sanidade fixo especial fincapé na elaboración dun novo contrato para sanitarios que mellora as condicións de médicos e enfermeiros e que espera que permita tamén atraer a máis profesionais doutras rexións a Galicia.
Pola súa banda, Luciano Garnelo, xefe de servizo do centro de saúde pintor Colmeiro, actuou como portavoz e valorou o "espírito conciliador e afable" no que transcorreu esta longa reunión na sede da Consellería. "Loxicamente hai propostas que teñen prazos", advertiu Garnelo, que celebrou que a Consellería accedese a implementar todas as medidas relacionadas coa área de Vigo, aínda que indicou que estarán pendentes de ver que isto se cumpre da forma debida.
Finalmente, subliñou que, aínda que non se acordou unha cifra concreta, todas estas actuacións levan de forma evidente un incremento da dotación orzamentaria prevista para atención primaria, tal e como reclamaban de forma previa ao comezo da reunión ao pedir un aumento do 15% inmediato e progresivo ata o 20% durante os próximos anos.
