Os traballadores sanitarios dos Puntos de Atención Continuada (PAC) de Galicia realizaron un paro de vinte minutos de duración para denunciar a "nula planificación" do Sergas e o "déficit en recursos humanos", nunhas mobilizacións desenvolvidas unha semana despois do falecemento, sen asistencia médica, dun home no PAC da Estrada.
Os paros laborais de protesta desenvolvéronse entre as 10.45 e as 11.15 horas ante os Puntos de Atención Continuada, convocados polos traballadores que forman parte do colectivo 'PACs en pé de guerra', e coa participación tanto do persoal sanitario como o de servizos xerais e, nalgúns casos, co apoio dos pacientes que acudiran ao centro.
Con esta medida, o colectivo sanitario reclamou á Xunta que dote aos PAC's de equipo "completo", posto que na actualidade algúns dos centros galegos están atendidos con tan "só un médico e un enfermeiro", segundo denunciou a súa portavoz, Ana Gonzalo.
Unha situación que provoca que ante unha urxencia nun domicilio, o PAC quede sen atención sanitaria, algo que resulta aínda máis grave para os pacientes que viven en zonas "nas que o Hospital máis próximo está a unha hora".
Por isto, os traballadores denunciaron que o "déficit de recursos humanos" e "a nula planificación a curto e longo prazo de cada un dos centros" habituais "agrávase" no período estival. "Este verán foi especialmente duro para nós ao ter que enfrontarnos a situacións de catástrofes, sobrecarga asistencial, dentro e fóra dos centros, que fai complicado poder dar unha atención cun mínimo de calidade, a pesar de pór todo o noso esforzo e profesionalidade niso", explica o colectivo nun comunicado.
Neste sentido, os traballadores da sanidade fan referencia aos "desgraciados sucesos acaecidos nestes últimos días", en referencia ao falecemento sucedido no PAC da Estrada, e acusan ás "distintas Xerencias e ao Sergas" de non ser "capaces de asumir responsabilidades" e de non denotar "indicios de analizar a situación e realizar unha boa xestión e planificación dos recursos".
Os sanitarios sosteñen que a falta de persoal para cubrir os equipos dos PACs de Galicia derívase da mala planificación por parte do Sergas e da precariedade laboral dos traballadores do Sergas. "Non hai persoal porque á xente que fixo a residencia de médico de familia non lle ofrecen un contrato de meses nun lugar, chámanos día a día e a xente vaise fóra e emigra", asegurou Gonzalo.
Precisamente, as protestas deste domingo que, segundo puntualizou a portavoz do colectivo, terán continuidade no tempo, foron encamiñadas tamén a mostrar apoio "aos compañeiros que se tiveron que enfrontar a situacións moi duras traballando". De forma paralela, os facultativos comezaron a realizar un rexistro "serio" no que mostrarán "cantas horas se están quedando os PACs sós sen atención".
CARTA ABERTA. Nunha carta aberta dos PACs en pé de guerra ante o falecemento dun home o sábado 4 de agosto que non recibiu atención médica cando se atopaba no Punto de Atención Continuada da Estrada, o colectivo denuncia que este feito se produciu "nun contexto de falta de cobertura do reforzo" e ante a ausencia do único equipo que desenvolvía o traballo esa tarde por acudir a unha urxencia fóra do centro.
No seu escrito, recordan que "desde hai meses" reclamaron ao Sergas que se cubrisen todos os PAC con equipos completos de "enfermeiro/a e médico/a e a revisión dos plans funcionais de cada centro", porque se está traballando "con recursos mínimos".
"Tras meses denunciando esta situación atopámonos que, no verán no que a carga asistencial e a poboación aumenta, o persoal co que estamos a traballar é inferior ao do resto do ano. Todo isto a pesar de que nos limitaron o tempo de goce de vacacións e permisos, que denegaron reducións de xornada por motivo de conciliación e que aumentaron a xornada, obrigando a facer quendas de traballo a maiores ao persoal do PAC", denuncian os traballadores.
Ante isto, acusan ao Sergas de que a súa solución sexa "unha vez máis a sobrecarga e o recorte de dereitos nun persoal extenuado" e que "xa non pode máis", e aféana que "bote balóns fóra coma se cousa se tratara do azar", reclamándolle "autocrítica".
FALTA DE PERSOAL. Nesta liña, o colectivo abunda nas súas críticas á Consellería de Sanidade, á que acusan de sobreexplotar "sempre aos mesmos" en lugar de formar a sanitarios "suficientes" que cubran as xubilacións que se xeran, ofrecer "prazas suficientes en oposicións", dotar ao persoal eventual de dereitos "mínimos para evitar a súa fuga" e, "en definitiva, cambiar unha estratexia que de xeito evidente non resolve nada".
Así, os traballadores deste colectivo acusan ao conselleiro de Sanidade, Jesús Almuíña, de querer aplicar unha "solución máxica" que pasaría, segundo as súas afirmacións, por recortar "servizos para os pacientes" e "pechar os PACs para adaptarse aos recursos actuais".
Fronte a isto, as súas propostas pasan por realizar un estudo das necesidades e problemas da poboación, por revisar as necesidades de recursos materiais de persoal e por unha educación sanitaria que fomente o correcto uso dos servizos. Como conclusión, desde 'PACs en pé de guerra' expresan o seu pesar á familia do home falecido na Estrada.
