Sanxenxo é o municipio máis caro para comprar unha vivenda en Galicia, segundo un estudo elaborado polo portal inmobiliario Idealista, que detalla que nesta localidade débese pagar unha media de 2.083 euros por metro cadrado. O informe indica que, a pesar de ser o municipio máis caro de Galicia, Sanxenxo é o oitavo máis alcanzable entre os 17 máis caros de cada comunidade autónoma.
Este prezo, ademais, está moi afastado do municipio máis exclusivo de España, a illa de Formentera, onde os propietarios de vivendas piden unha media de 7.401 euros o metro cadrado.
O podio dos cinco municipios máis caros complétase con outras catro localidades baleares: Deya (5.342 euros/m2), Eivissa (5.318 euros/m2), Sant Joan de Labritja (5.267 euros/m2) e Sant Josep de Sa Talaia (5.106 euros/m2). O sexto posto é para Cadaqués, na xerundense Costa Brava, con 5.098 euros/m2.
Por baixo dos 5.000 euros por cada metro cadrado están Santa Eulalia del Río en Baleares (4.754 euros/m2), Baqueira en Lleida (4.541 euros/m2), Zarautz en Guipúzcoa (4.540 euros/m2) e Andratx en Baleares (4.489 euros/m2). O undécimo posto é para Naut Aran en Lleida (4.424 euros/m2), seguido pola Moraleja en Madrid (4.401 euros/m2), San Sebastián (4.372 euros/m2), Barcelona (4.206 euros/m2) e Sant Antoni de Portmany en Baleares (4.008 euros/m2).
AUTONOMÍAS. O estudo realizado por Idealista complétase coas localidades máis exclusivas de cada unha das 17 comunidades autónomas españolas. Ademais das comunidades con rúas nas 25 primeiras posicións, 5 autonomías máis teñen mercados nos que se superan de media os dous mil euros por metro cadrado: Formigal en Aragón (2.935 euros/m2), Marbella en Andalucía (2.910 euros/m2), Moraira na Comunitat Valenciana (2.607 euros/m2), Pamplona en Navarra (2.266 euros/m2) e o propio Sanxenxo.
A máis económica é Estremadura, onde o seu municipio máis caro (a cidade de Badaxoz) ten un prezo medio de 1.171 euros/m2, seguida por Guadalaxara en Castela-A Mancha (1.409 euros/m2) e A Manga do Mar Menor en Murcia (1.482 euros/m2).
