Os hospitais galegos non comunicaron este martes, por sexto día consecutivo, ningún falecemento vinculado coa pandemia do coronavirus na comunidade.
Así, en total, en Galicia o número de falecidos ligados ao Covid-19 mantense en 618. As dúas últimas mortes foron notificadas o martes e mércores da semana pasada, co que, no que vai de mes de xuño, só se notificaron falecementos con coronavirus dous días.
Desta forma, o Sergas constata que desde o inicio da pandemia morreron 486 persoas con PCR positiva en atención hospitalaria e 132 dentro de residencias de maiores.
Ademais deste martes, 9 de xuño, os días sen mortes atribuídas á pandemia en hospitais foron os pasados 29 de abril, 14, 18, 19, 25, 27, 28, 29, 31 de maio e 1, 4, 5, 6, 7 e 8 de xuño.
A primeira vítima mortal deste virus rexistrouse o 14 de marzo, unha muller de 92 anos que se atopaba ingresada no Hospital Povisa de Vigo. Nesa mesma xornada producíase tamén a morte dun home de 81 anos ingresado en Pontevedra e que deu positivo na proba de Covid-19.
Neses días, os primeiros da alerta sanitaria en Galicia, nos que a comunidade contaba con menos de 300 casos activos, houbo dúas xornadas nas que non se rexistrou ningunha morte hospitalaria, o 15 de marzo e o 17 de marzo.
A partir do 18 de marzo, cando as vítimas mortais en Galicia ascendían xa a catro persoas, os hospitais da comunidade comunicaron falecementos todos os días, excepto en 16 xornadas, incluído este luns, das que seis foron nos primeiros nove días do mes de xuño.