O Tribunal Superior de Xustiza de Galicia (TSXG) paralizou a execución da sentenza emitida o 29 de xaneiro na que ordenaba repor nos seus cargos ao secretario e á interventora xerais cesados no mandato do exregidor Gerardo Conde Roa, e apartar dos mesmos as persoas que o exercían desde aquel momento.
O pasado ano o TSXG declarou nulas as prazas de secretario e interventor de apoio creadas para recolocar os que ocupaban o cargo inicialmente, que foron substituídos por outras dúas persoas. Ante esa decisión, o Concello recorreu, e de novo o TSXG, tras un proceso a instancias da CIG, ordenou a Raxoi en xaneiro de 2015 reincorporar a ambas as persoas, as cales foron cesadas dos seus postos en 2012, e apartar as actuais.
Vista esa sentenza firme, o Concello decidiu non recorrer: "Tiñamos pensado acatala", sinalou esta mañá o alcalde de Santiago, Agustín Hernández (PP). Con todo, as persoas nomeadas por Conde Roa e que ocupaban o posto na actualidade si recorreron a sentenza do mes pasado.
Tras coñecer o fallo, ambos os traballadores alegaron "indefensión" xa que "non eran parte" do proceso xurídico, polo que non tiveron "acceso ao procedemento", a pesar de que si foron "prexudicados" directos da sentenza.
O TSXG admitiu a trámite este recurso, para analizalo, polo que queda "suspendida a execución" do cesamento, avanzou o alcalde. "O Concello non alegou e respectou a decisión do 29 de xaneiro, e respecta a decisión da que temos coñecemento hoxe", incidiu Hernández, que, polo momento, non destituirá ao actuais interventor e secretario. "Aceptamos a primeira sentenza e aceptamos a que temos hoxe encima da mesa", resolveu o rexedor.
En canto a outra sentenza do mes de xullo que ordena a restitución do traballador local Miguel Vilariño, que foi apartado do seu posto no departamento de Relacións Veciñais tras detectar erros nas facturas polas que se condenou ao exedil Juan de la Fuente, o rexedor explicou que o Goberno local non ten "ningún problema" en restituílo se é o seu "desexo volver ao traballo que tiña".
Nun principio o Concello si recorreu esta sentenza, "por indicacións dos servizos xurídicos", pero agora o propio alcalde decidiu "retirar de forma voluntaria" este recurso para que Vilariño volva ao seu posto inicial. "Cando chegan sentenzas non todas chegan á mesa do alcalde, e agora cando teño o coñecemento fago unha pregunta, obteño unha resposta e tomo unha decisión", indicou Hernández sobre o cambio de postura en canto a Vilariño refírese.
Preguntado tamén pola condena ao exconcelleiro do Concello Juan de la Fuente (PP), como autor "plenamente responsable dun delito de falsidade" de documentación, o rexedor insistiu en que é hora de mirar "ao futuro", algo que, ao seu xuízo, xa "quedou acreditado o pasado 8 de xullo" cando tomou posesión como máximo dirixente do novo goberno local.
