Representantes de CCOO e UXT pediron este martes ao Goberno asturiano que se comprometa coa continuidade das plantas de Alcoa e que inste ao Executivo central a aprobar xa o estatuto da industria electrointensiva porque é un "alicerce fundamental" para atopar un investidor para a empresa.
Momentos antes da reunión mantida entre os sindicatos e o Goberno rexional, o secretario xeral de CCOO de Industria en Asturias, Damián Manzano, reclamou ao Principado o inicio dos traballos para asegurar a continuidade e viabilidade de Alcoa e a garantía do mantemento do emprego.
Tamén considerou "fundamental" que o Goberno de Javier Fernández inste de xeito urxente á ministra para a Transición Ecolóxica, Teresa Ribera, a pór en marcha xa o estatuto da industria electrointensiva, "un alicerce fundamental" para conseguir que quen poida ter interese nun proxecto como Alcoa o poña en marcha.
O secretario de política sindical de Federación de Industria, Construción e Afíns de UXT, Javier Campa, indicou que cada día que pasa hai un día menos porque Alcoa ten "data de caducidade".
Na súa opinión, o primeiro que ten que facer o Goberno en España é dar saída dunha vez ao estatuto da industria electrointesiva porque "sen iso sería difícil atopar un investidor para Alcoa".
O presidente do comité de empresa da planta de Alcoa en Avilés, Manuel de la Uz, sumouse a esta petición e pediu ao Executivo asturiano que busque un investidor para a fábrica de Avilés.
Pola súa banda, o conselleiro de Emprego, Industria e Turismo, Isaac Pola, avanzou que o martes está convocada en Madrid unha mesa de seguimento dos acordos e que este martes abordarán por onde se van enfocar os traballos para buscar unha solución integral para o conxunto das actividades industriais involucradas na planta de Alcoa que permita manter a actividade industrial e o emprego en Avilés.
O conselleiro sinalou que a posta en marcha do estatuto da industria electrointensiva era unha das partes do compromiso adoptado e asegurou que o Principado será "belixerante" á hora de pedir que se desenvolva o máis axiña posible sen esgotar o prazo dos seis meses.
