Sito Miñanco permanece en folga de fame no cárcere da Lama

O seu avogado asegura que esta situación estalle provocando problemas pola diabete e a tensión que padece

Sito Miñanco, no xuízo. GONZALO GARCÍA
photo_camera Sito Miñanco, no xuízo. GONZALO GARCÍA

José Ramón Prado Bugallo, máis coñecido como Sito Miñanco, permanece na prisión pontevedresa da Lama onde foi trasladado a semana pasada para enfrontarse a un xuízo pendente por suposto branqueo de capitais procedentes do narcotráfico, o cal finalmente quedou suspendido polas recusacións presentadas por dúas das partes. 

Fontes xurídicas confirmaron a Europa Press que Sito Miñanco continúa a folga de fame que iniciou hai agora unha semana polo trato recibido na prisión da Lama, o cal, segundo explicou o seu avogado, Gonzalo Boye, complícalle o seu estado de saúde pola diabetes e a tensión. 

En todo caso, trátase dunha decisión "persoal" de Sito Miñanco, que recentemente reingresou en prisión tras ser detido en Alxeciras cando gozaba dun réxime de semiliberdade tras cumprir parte dunha condena anterior. 

Sito Miñanco foi detido no marco dunha macrooperación contra o narcotráfico o pasado 5 de febreiro, nun despregamento policial no que tamén foron arrestados unha filla e o fillastro do tamén narcotraficante Laureano Oubiña. 

No xuízo pendente en Pontevedra, están procesados ademais de Sito Miñanco, a súa primeira muller, unha excuñada e un empresario considerado pola Fiscalía como o seu home de palla. O Ministerio Público pide seis anos de cárcere e dez millóns de euros de multa. 

Comentarios