Tres mozos, dous deles menores de idade, foron sorprendidos esta madrugada no municipio pontevedrés de Mos conducindo sen licenza motocicletas de cros sen iluminación e carentes de documentación, informou a Garda Civil. Unha patrulla da Garda Civil ordenoulles deterse cara ás 4.30 horas cando circulaban sen ningún tipo de iluminación por unha zona da parroquia de Torroso pilotando tres motocicletas de cros (Pit-Bike) cuxo uso está restrinxido unicamente a circuítos pechados.
Sorprendidos pola presenza dos axentes, os tres motoristas desobedeceron os sinais de alto e fuxiron campo a través, polo que a Garda Civil procedeu a perseguilos e foron localizados horas máis tarde con axudas de patrullas doutras zonas veciñas.
O primeiro de pilotos achados foi un mozo de 14 anos, residente en Mos, en cuxo domicilio os axentes da Garda Civil que acudiron para informar aos seus pais, acharon á nai que regresaba acompañada doutro fillo, de 16 anos de idade, que resultou ser outro dos fuxidos e que avisara para que o fora recoller.
As xestións concluíron coa localización das motocicletas nunha zona forestal e a identificación do terceiro piloto, de 20 anos, tamén residente no mesmo municipio.
Ningunha das tres motocicletas dispuña da preceptiva documentación para circular por unha vía pública e os mozos non tiñan tampouco o permiso de conducir obrigatorio. As dilixencias instruídas foron entregadas no Xulgado de instrución de garda do Porriño e na Fiscalía de Menores.
