Stop Desafiuzamentos reclama en Santiago de Compostela a dación en pago para un cliente do BBVA

Stop Desafiuzamentos concentrouse este mércores ante a sede do BBVA na rúa da Senra, en Santiago, para reclamar a dación en pago para un cliente compostelán que ten a súa vivenda en Mallorca, que se sacará a poxa en outubro por deber 190.000 euros, aínda que segundo asegura a plataforma, a débeda "real" é de 50.000 euros.

En declaracións aos medios, María, integrante de Stop Desafiuzamentos Compostela, explicou o caso de José, un compostelán que emigrou a Palma de Mallorca onde se fincou e comprou unha vivenda. Tras perder o seu emprego e esgotar a súa prestación e aforros pediu un crédito ao BBVA para pagar a hipoteca.  O caso é que José seguiu sen conseguir emprego e atopouse sen poder pagar nin a hipoteca nin o crédito. Así, José volveu a Santiago onde vive coa súa nai cunha minusvalía, mentres o seu pai pensionista exerce de avalista.

Stop Desafiuzamentos sinala que a débeda da vivenda seguía aumentando en Palma de Mallorca sen que José puidese desprazarse ata as Baleares para defenderse, mentres o poder xudicial "non chegou a tempo" para ofrecerlle un avogado de oficio co que oporse á execución hipotecaria, polo que o BBVA puxo o próximo 7 de outubro como data de poxa da vivenda.

Respecto diso, esta plataforma critica que José "non foi avisado de que había un código de boas prácticas ao que podía acollerse" e denuncian a "mala praxe" da entidade, que fixo que a débeda do seu cliente "aumentase máis e máis", mentres se vai a quedar cos 100.000 euros que xa puxo" o afectado, duns 40 anos, e cos "180.000 euros" que van pagar os novos compradores pola vivenda, aseguran.  Nesta liña, María recorda que hai unha lei que protexe aos debedor de boa fe, pero "neste caso queren todo", no que identifica "con rapiña".

ACCIÓN DO CONCELLO E VERSIÓN DE BBVA. Preguntada pola acción do Concello de Santiago neste caso, María indica que esperan que "dea un paso" para falar co banco e se elimine a débeda que ten que pagar o seu cliente mentres a entidade queda coa vivenda. Nesta protesta estivo presente, entre outros, o portavoz municipal do BNG, Rubén Cela.

Pola súa banda, fontes do BBVA sinalan que a entidade non está autorizada para falar das situacións dos seus clientes, pero destaca que "sempre busca unha solución adecuada a cada caso e cada cliente".