A detección dun erro na confección dos exames da materia Historia da Filosofía provocou que o fin da selectividade galega, previsto para o mediodía deste venres, teña que posporse ata a xornada de tarde. Uns 2.900 alumnos víronse afectados por un erro que afectou aos seis formularios.
A realización desta proba, de carácter optativo, estaba prevista para as 11.00 horas en todos os centros de exame de Galicia, pero o erro na súa elaboración provocou os alumnos teñan que realizar esta proba ás 16.00 horas.
O problema xurdiu cando os responsables da comisión delegada comprobaron que tanto o exame principal como o de reserva non se axustaban aos criterios elaborados polo grupo de traballo da materia.
Segundo explicou a Europa Press Pedro Armas, da CIUG, o coordinador deste grupo de traballo é o encargado de presentar os formularios. En total, encárganse seis que logo se someten a sorteo, dos que saen tanto o cuestionario titular como o reservado para incidencias. "Neste caso, ningún dos exames remitidos polo coordinador cumpría con eses requisitos".
O presidente da CIUG lamenta o "descoido"
Neste sentido e dado que os alumnos "non poden verse sometidos a un exercicio que incumpre as instrucións que se lles estivo enviando", a CIUG tomou a decisión de aprazar o exame ata as 16.00 horas e pediu "desculpas" tanto ás familias como aos alumnos afectados.
Celso Rodríguez, presidente da CIUG, lamentou o "descoido" e o prexuízo que poida provocar nos alumnos, a quen se lles "prolongan os nervios", pero asegurou que a entidade non tivo "máis remedio" que pospor a proba e preparar un novo exame que cumpra coas indicacións.
Os alumnos crearon unha petición en Change.org para pedir a dimisión do grupo de traballo e unha compensación pola tensión creada
Esta situación nunca se deu como tal nestas probas dado que, aínda que si se produciron incidencias coa proba principal, a de reserva sempre se axustou aos parámetros definidos e remitidos aos centros. É por iso, que Rodríguez sopesa a necesidade de reforzar estes controis para garantir que os cuestionarios cumpran coas bases.
As redes sociais, sobre todo Twitter, enchéronse de queixas dos asistentes ás probas e incluso se impulsou unha petición en Change.org, apoiada xa por varios centos de alumnos, para pedir a dimisión do grupo de traballo e unha compensación na corrección pola tensión sometida aos estudantes, pais e profesores.
Tampouco se trata da primeira incidencia na presente convocatoria de selectividade, dado que o xoves producíronse queixas pola calidade das imaxes do exame de Historia da arte e foi necesario cambiar o de Lingua Galega polo de reserva en toda Galicia tras abrirse un paquete antes de tempo nunha comisión delegada.
