"Teño ganas de ir á Mariña, que mellor sitio para recuperarme que en casa"

O policía nacional de San Cibrao ferido en Barcelona chegará nuns días á zona tras abandonar o hospital logo dunha semana
El policía sancibrense Ángel Manuel Hernández poco antes de dejar el hospital. AMA
photo_camera O policía sancibrense Ángel Manuel Hernández pouco antes de deixar o hospital. AMA

Logo dunha semana ingresado, o policía nacional de San Cibrao ferido os disturbios provocados nas rúas de Barcelona tras a sentenza do procés foi dado de alta este venres e nuns días Ángel Manuel Hernández Sánchez chegará á comarca para descansar. "Teño ganas de estar alí, que mellor sitio para recuperarme que en casa", conta xa fóra do hospital o axente, convertido en protagonista moi ao seu pesar, ao ser un dos axentes feridos polos radicais que tomaron as rúas. "Levo vinte puntos de sutura, seis parafusos e unha placa conmemorativa", conta, intentando relativizar as consecuencias dos disturbios. 

O policía mariñán recorda perfectamente a escena na que foi ferido e confirma que o forte impacto sufrido lle chegou inesperadamente desde algún lugar alto. "A traxectoria non era en vertical, nin en parábola nin de fronte, senón que o lanzaron desde arriba e foron lastros máis voluminosos que os outros que estaban a lanzar", afirma en plural porque foron dous os golpes que recibiu, un no brazo e outro no homóplato, este último amortecido considerablemente polo chaleco que forma parte do equipamento dos axentes da Unidade de Intervención Policial, á que pertence o axente cervense. 

"E, aínda así, teño un derrame tremendo", explica, mentres recoñece que se deu conta da gravidade da lesión de xeito inmediato. "En canto me deron no antebrazo tíñao claro", recorda, algo que corroborou o parte médico: fractura aberta de radio con desprazamento e óso astillado, unhas feridas das que foi operado, xusto o mesmo día en que o presidente do Goberno en funcións, Pedro Sánchez, visitou en Barcelona os feridos. "A min non me puido saudar porque estaba en quirófano", conta, a piques de emprender viaxe a Galicia.

Comentarios