O Ministerio de Sanidade, Consumo e Benestar Social publicou este mércores os últimos datos de interrupcións voluntarias do embarazo, que un ano máis mostra un lixeiro aumento con respecto a anos anteriores. Ao longo de 2018, abortaron un total de 95.917 mulleres —11,12 por cada 1.000 mulleres—, o que supón un incremento do 1,91% respecto de 2017. No entanto, Galicia, con 6,5 por mil, arroxa a segunda menor taxa de España, só por detrás do dato conxunto de Ceuta e Melilla. Foron case 3.000 intervencións.
Sanidade sinala que os datos estatais apuntan a unha "tendencia á estabilización". Con todo, están moi por baixo do 2010, último ano coa regulación anterior á actual, cando o cociente chegaba a 11,49 por mil.
En Galicia, a estatística máis elevada correspóndese con 2011, con 7,76. Desde entón descenderon cada ano. Na comunidade practicáronse o curso pasado un total de 2.958 interrupcións do embarazo. Delas, 1.459 ocorreron na Coruña, 724 en Pontevedra, 400 en Ourense e 344 en Lugo.
En canto á idade da muller, en nove casos tiña 15 ou menos anos, e baixaba dos 20 en 253. A franxa máis común, co 20,6%, está entre os 25 e os 29 anos. O seguinte tramo quinquenal ofrece unha porcentaxe practicamente idéntica.
As táboas do ministerio precisan tamén os motivos esgrimidos para practicar o aborto. O principal, que engloba o 93,7% das situacións, é unha petición da propia embarazada. No entanto, 94 casos debéronse a que se detectou unha grave posibilidade de anomalías "" no feto, mentres que outros 87 respondían a que o embarazo puña en grave "risco" a vida ou a saúde da nai. En cinco, o feto padecía anomalías "incompatibles coa vida" ou signos dunha enfermidade "extremadamente grave e incurable".
