Unhas 150 persoas participaron este luns na marcha que partiu da planta de Alcoa, no municipio de Cervo, e terminou na Praza do Concello de Burela, para pedir medidas que favorezan a supervivencia das fábricas que a multinacional ten en Galicia –A Coruña e Cervo– e Asturias.
Nesa marcha, ademais de traballadores e representantes sindicais, participaron tamén representantes políticos da Mariña.
O presidente do comité de empresa da factoría de Cervo, Xosé Paleo (CIG), recoñeceu que os empregados dese centro de traballo non están "para nada" tranquilos, a pesar de que o anuncio de peche por parte de Alcoa só lle afecta ás plantas de Avilés e A Coruña.
De feito, en declaracións aos medios de comunicación subliñou que a "dirección" busca con esta estratexia "dividir" aos propios traballadores, pero "posiblemente, nun futuro curto, se non se soluciona o problema da enerxía", o persoal de Cervo podería estar "a vivir unha situación parecida".
No manifesto que leron na Praza do Concello, os representantes sindicais solicitaron un prezo da enerxía xusto e competitivo a nivel europeo, dado que as fábricas que Alcoa ten en países como Noruega ou Islandia conseguen a subministración cunha tarifa "tres veces máis barata" que os centros de España.
De feito, recordou que unha das plantas da multinacional en Noruega é rendible, a pesar de que ten a mesma tecnoloxía que a fábrica de Alcoa na Coruña.
"O problema é a enerxía", insistiu Paleo, porque se está "cobrando a produción das hidroeléctricas e das centrais nucleares" ao mesmo prezo que a enerxía que se produce en plantas que usan gas.
Por iso, afirmou que calquera medida que contribúa a fixar un prezo da enerxía asumible para que Alcoa siga funcionando durante moitos anos, será "ben recibida".
