A Dirección Xeral de Tráfico (DXT) intensificará desde este luns ata o domingo os seus controis de alcoholemia e outras drogas en vista de que en datas do Nadal aumenta o consumo destas sustancias, e prevé realizar unhas 20.000 probas diarias, que serán a calquera hora e en todo tipo de vías.
Como vén sendo habitual nos últimos anos por estas datas de comidas e ceas do Nadal, a DXT quere concienciar con esta campaña sobre o risco que supón o consumo de sustancias psicoactivas e a condución, que causan case un terzo dos accidentes mortais.
Esta campaña desenvólvese de forma simultánea en 25 países europeos a través da Organización Internacional de Policías de Tráfico (TISPOL), informa este domingo a DXT nun comunicado.
Segundo Pere Navarro, director xeral de Tráfico "o obxectivo deste tipo de campañas é concienciar aos cidadáns que non só o alcol é incompatible coa condución, senón que outras drogas como o cannabis, a cocaína, anfetaminas e opiáceos son sustancias psicoactivas que teñen efectos, en moitos casos letais, cando despois se conduce".
Para Navarro, "a realización destes controis preventivos na estrada é xunto coa educación viaria, un dos instrumentos máis eficaces para disuadir ao condutor de porse ao volante se consumiu calquera sustancia psicoactiva".
Nos controis, porase especial énfase nos colectivos policonsumidores, é dicir aqueles condutores que se poñen ao volante e que consomen habitualmente alcol e/ou drogas.
Co obxectivo de que a campaña se xeneralice tamén nas vías urbanas, Tráfico invitou aos concellos de máis de 25.000 habitantes a que se somen a ela con controis nos seus respectivos centros urbanos.
En 2017, o 26% dos condutores falecidos do ámbito competencial da DXT e analizados polo Instituto Nacional de Toxicoloxía e Ciencias Forenses, así como polos Institutos de Medicina Legal e Ciencias Forenses de Murcia e Galicia, deu resultados positivos na proba de alcol, e deles, o 74 % presentaba unha taxa superior a tres veces a taxa máxima permitida.
A DXT recorda que a Lei de Seguridade Viaria contempla unha sanción de 500 euros e a retirada de 4 puntos do carné para os que conduzan por encima da taxa permitida, que será de 1.000 se os condutores reincidentes, é dicir, aqueles que fosen sancionados no ano inmediatamente anterior por dar positivo a alcol.
Esta mesma sanción de 1.000 euros aplícase tamén a aqueles condutores que circulen cunha taxa que supere o dobre da permitida.
No caso das drogas, a lei prohibe conducir con estas sustancias, excepto as que se usen baixo prescrición facultativa e cunha finalidade terapéutica, baixo unha infracción tamén de 1.000 euros e a retirada de 6 puntos.
O Código Penal tamén prevé penas de prisión ou multas, así como a privación do dereito a conducir, no caso de que a taxa de alcol sexa especialmente alta (por encima de 0,60 miligramos por litro de aire).
