Os transportistas do carbón cortan este luns o acceso á dársena interior e ao porto exterior de Ferrol. Os camioneiros mobilizáronse á primeira hora da mañá e colocaron rodas para impedir o acceso aos vehículos. Desde o colectivo anunciaran que se radicalizarían as protestas logo da decisión de Endesa de pechar a térmica pontesa antes de 2022.
Esta acción de protesta prodúcese horas antes de que o presidente da Xunta, Alberto Núñez Feijóo, se reúna este luns en Santiago, a partir das 17,30 horas, cos integrantes do grupo de traballo por unha transición xusta, composto por partidos políticos con representación no Concello das Pontes, sindicatos, comité de empresa, empresarios, comerciantes e transportistas do carbón.