O Tribunal Xeral da Unión Europea (UE) avalou este martes á empresa galega Yatecomeré nunha disputa polo rexistro dunha marca solicitada pola firma catalá The GB Foods, ao considerar que existía risco de confusión entre ambas as denominacións. O conflito iniciouse en 2013 cando The GB Foods, con domicilio social en L'Hospitalet de Llobregat solicitou o rexistro da marca europea Yatekomo para alimentos como carne, peixe, froitas e verduras, ovos, leite e produtos lácteos.
En maio de 2015 a empresa Yatecomeré, con domicilio social en Ribadumia, presentou unha solicitude de nulidade da marca Yatekomo respecto de todos os produtos para os que fora rexistrada.
A solicitude de nulidade baseábase na marca figurativa española "Yatecomeré, o baleiro que te enche", rexistrada pola empresa galega para produtos alimenticios. En xuño de 2016, a Oficina europea de Propiedade Intelectual EUIPO estimou parcialmente a solicitude de nulidade, baseándose en que existía risco de confusión, e anulou a marca da empresa catalá respecto de produtos como carne, peixe, froitas e verduras.
Dese xeito, a marca de GB Foods quedou rexistrada unicamente para arroz, tapioca e sagú; fariñas e preparacións a base de cereais; pan, produtos de pastelería; azucre; fermento e pos de fornear, e xeo.
En agosto de 2016, a empresa catalá recorreu ante a EUIPO, pero o seu recurso foi desestimado, ao entender a oficina que había un risco de confusión que xustificaba a anulación do rexistro da marca de The GB Foods respecto de todos os produtos controvertidos. O Tribunal Xeral da UE avalou este martes á EUIPO e desestimou o recurso de The GB Foods, confirmando en todos os seus puntos a resolución da oficina europea.
