A segunda e última das xornadas de folga convocadas polos tripulantes de cabina de Ryanair avanzou sen incidencias e os sindicatos non descartan novas mobilizacións mentres piden ao Goberno que "tome cartas no asunto" ante os "abusos" e os "malos tratos" da aeroliña. Santiago foi un dos aeroportos onde os traballadores da aeroliña irlandesa se manifestaron. Ademais, tamén se concentraron en Barcelona, Málaga, Gran Canaria, Tenerife Sur, Lanzarote e Palma de Mallorca sen producirse incidencias.
En España, a folga provocou a cancelación de dous voos conectaban Palma con Bruxelas e a capital mallorquina coa belga, segundo os datos facilitados por USO, que xunto a Sitcpla foron os sindicatos convocantes da folga en España. Durante as dúas xornadas de paro, que tiña como obxectivo esixir á compañía que aplicase a lexislación española nos contratos, permitise unhas eleccións sindicais e respectase o estatuto dos traballadores, os sindicatos sosteñen que se cumpriron os servizos mínimos e apuntan a un seguimento medio do 60%.
A aeroliña, que non deu datos de voos anulados nin de seguimento durante estes dous días, xa anunciara antes de que Fomento decretase os servizos mínimos a cancelación de ata 400 voos en España para as dúas xornadas de folga e de ata 600 en Europa, o que afectaría a 100.000 clientes en total aos que, asegura, lles reembolsou ou buscou un voo alternativo.
Esta segunda xornada de folga dos tripulantes de cabina afectou tamén a Portugal e a Bélxica pero, a diferenza deste mércores, non a Italia, xa que os paros tanto de tripulantes como de pilotos neste país convocáronse exclusivamente para o 25 de xullo.
Durante o transcurso da folga en España, os sindicatos de tripulantes de cabina acusaron á aerolínea irlandesa de non querer colaborar e "chulear" á Inspección de Traballo, que acudiu ás bases de Tenerife e Santiago de Compostela. "Non pode ser que non haxa ningunha autoridade que tome accións contra a chulería da aeroliña. Gustaríanos que alguén tomase cartas no asunto", sinalou este xoves o responsable de Voo de USO Sector Aéreo, Ernesto Iglesias.
Desde Sitcpla, Antonio Escobar, afirmou que Ryanair incumpriu os servizos mínimos, cancelando voos que conectaban cos arquipélagos, a pesar das obrigacións que marcaba a resolución ditada por Fomento, que obrigaba á compañía a garantir o 100% dos voos domésticos ás illas. Tamén sobre a folga se pronunciou o secretario xeral de CCOO, Unai Sordo, que esixiu unha lexislación básica europea en materia laboral e fiscal, porque "non pode ser que unha empresa que radique en Irlanda, que ten laxa lexislación laboral, o utilice como cabalo de Troia para deteriorar as condicións de traballo e facer dumping fiscal".
Ademais, o secretario xeral de UXT, Pepe Álvarez, coincidiu con Sordo na necesidade de establecer unha mínima regulamentación europea que impida situacións como a de Ryanair, "seguramente a empresa máis pirata e descarada", aínda que "hai outras multinacionais que aproveitan esta falta de lexislación".
A asociación de consumidores Adicae anunciou este xoves que proporá unha revisión a fondo do actual marco de protección dos dereitos dos consumidores no transporte de viaxeiros para reforzar a súa posición e dereitos efectivos ante as cancelacións e problemas no transporte en vacacións, mentres que a Asociación Catalá de Axencias de Viaxes Especializadas (ACAVe) pediron ao Goberno que regule o dereito de folga no sector aéreo.
Outro sindicato, neste caso o de pilotos Sepla, xa avanzou que interporá este xoves ante a Audiencia Nacional unha demanda contra a aeroliña Ryanair por manter ao colectivo que opera en España baixo a lexislación irlandesa.
A estas recentes folgas sumarase tamén a que os pilotos contratados pola aeroliña en Irlanda, ao redor dun centenar, anunciaron este xoves para o próximo 3 de agosto, a cuarta que convocan neste país desde o pasado 12 de xullo. Este anuncio prodúcese despois de que Ryanair anunciase recortes do 20% da súa flota con base en Dublín este inverno e posiblemente o despedimento de 100 pilotos e 200 tripulantes de cabina nas próximas semanas.
Coincidindo con todas as folgas, Ryanair puxo á venda un millón de asentos con ata un 20% de desconto dispoñibles para viaxar entre o próximo 1 de agosto e 30 de setembro.
