A polo momento Valedora do Pobo, Milagros Otero, mostrou este xoves a súa disposición a dimitir do cargo tras o escándalo en que se viu envolvida a institución por mor dunha contratación anulada pola Xustiza, aínda que condicionou a súa saída a que os grupos parlamentarios se poñan de acordo previamente sobre o seu substituto ou substituta á fronte da institución, unha premisa avalada pola presidencia do Parlamento e criticada pola oposición.
Apenas 24 horas logo de transcender que o Tribunal Supremo ratificou a nulidade do nomeamento do posto de xefe de servizo de Administración e Persoal, por "desvío de poder", a María Puy Fraga, sobriña do expresidente Manuel Fraga e irmá do portavoz parlamentario do PPdeG, a Valedora remitiu unha carta ao Parlamento para pór o seu cargo a disposición da Cámara. E é que é o Parlamento quen a nomeou, a proposta do Partido Popular, e tamén quen ten potestade para revogala cunha maioría reforzada dos deputados.
O presidente do Parlamento, Miguel Santalices, cre que Milagros Otero acerta ao condicionar a súa saída a que se nomee xa a súa substitución para evitar así un baleiro de poder. "Foi unha decisión sensata", apuntou o ourensán. "Unha institución tan importante como a do Valedor do Pobo non pode ter unha sensación sen carga".
A outra opción sería que ocupase o cargo de forma transitoria o vicevaledor, Pablo Cameselle, nome impulsado polo PSOE.
SEGUNDA DIMISIÓN. A de Milagros Otero, a falta de consumarse, será a segunda dimisión á fronte da institución logo da de Benigno López no ano 2012, presionado polas críticas da oposición tras efectuar unhas polémicas declaracións nas que avalaba os recortes sanitarios e a suspensión da lei de dependencia en plena crise económica.
É demasiado balbordo para unha institución relativamente nova, xa que, aínda que foi creada por lei en 1984, o primeiro Valedor non tomou posesión ata 1990. Con todo, mentres que Benigno López abandonou o cargo inmediatamente, asumindo as rendas José Julio Fernández, entón vicevaledor, Milagros Otero opta por esperar a que se pacte a súa substitución, unha manobra detrás da que a moitos ven un intento de non deixar como Valedor a un socialista como Pablo Cameselle.
A condición que pon Otero pode mantela no posto máis do previsto, xa que o novo nomeamento necesita o aval de tres quintos da Cámara; é dicir, o PPdeG e polo menos outro dos tres grupos, o que pode complicar o acordo. Pero mentres iso non ocorra, a Valedora aclara que "quere garantir á cidadanía que as súas queixas seguirán sendo tramitadas con normalidade como ata o momento" e "ata o último día".
