A ministra de Traballo, Migracións e Seguridade Social, Magdalena Valerio, comprometeuse este domingo a estudar "en profundidade" o Expediente de Regulación de Emprego (ERE) extintitvo presentado por Alcoa para as súas plantas da Coruña e Avilés e rexeitou que o Goberno interveña a empresa.
A ministra acudiu a un acto do PSdeG en Santiago de Compostela, onde foi proclamado oficialmente como candidato á Xunta o secretario xeral dos socialistas galegos, Gonzalo Caballero.
Antes de participar no acto, preguntada pola posibilidade de que o Goberno puidese intervir a empresa, exposta polos representantes dos traballadores, asegurou que España non é unha economía estatalizada.
INTERVENCIÓN. "¿Como intervención? Non estamos nun réxime comunista", concluíu a ministra, que anteriormente se comprometeu a estudar "en profundidade" o ERE para dar unha solución que confía en que sexa "satisfactoria" para mellorar a situación dos miles de persoas afectadas, entre empregados (uns setecentos) e as súas familias.
Este sábado, durante unha nova xornada de protestas, os representantes dos traballadores reclamaron na Coruña a intervención da multinacional estadounidense por parte do Goberno para evitar o peche das súas fábricas de aluminio na cidade galega e en Avilés (Asturias).
"O Goberno debe aplicar canto antes o artigo 128.2 da Constitución Española e intervir as fábricas antes de que sexa demasiado tarde”, dixo a Efe o presidente do comité de empresa da planta de Alcoa na Coruña, Juan Carlos López Corbacho.
A pesar de que este artigo nunca se aplicou, Corbacho apuntou que “ata agora nunca se deron as condicións; isto é, que se trate dunha empresa estratéxica para o Estado e que a súa intervención responda o ben nacional”.
“No caso de Alcoa esta intervención estaría máis que xustificado porque hai un monopolio, é o único produtor de aluminio primario de España, ten as únicas tres plantas do Estado: a da Coruña, a de Avilés e a de San Cibrao (Lugo)”, sinalou.
A ministra, ademais, sinalou que os temas da reforma laboral seguen tratándose na mesa de diálogo social.
