O premio Nobel de Literatura Mario Vargas Llosa percorreu este venres un tramo do Camiño de Santiago, con motivo da súa visita á Universidade da Coruña (UDC).
O Nobel partiu ás 17.30 horas da ponte do Burgo, na localidade coruñesa de Culleredo, acompañado polo conselleiro de Cultura e Turismo, Román Rodríguez, e o reitor da UDC, Julio Abalde, informan a institución académica e a Xunta en senllos comunicados.
O escritor, que recibiu de mans do conselleiro un exemplar do Códice Calixtino, interesouse pola tradición xacobea e polo próximo Ano Santo, que situará a Galicia no mapa mundial das peregrinacións e do turismo no ano 2021.
Pola mañá, Vargas Llosa foi recibido por máis de 400 persoas no paraninfo da Universidade coruñesa, que organizou durante toda a xornada un Seminario Internacional de Investigación e Divulgación sobre a súa obra con relatores de tres continentes.
"Agradezo moito á Universidade da Coruña organizar este encontro sobre os meus libros que me permitiu reencontrarme con vellos amigos e facer algúns novos. A vista desde estas oficinas é soberbia, así como a xenerosa hospitalidade. Grazas de novo", escribiu o Nobel no Libro de Ouro da UDC.