O pasado sábado a Policía Local de Oleiros desprazábase á parroquia de Dorneda, tras ser alertada pola desaparición dunha octoxenaria. Os veciños foron os que deron a voz de alarma.
"Había dous ou tres meses que non a vía", aseguraba unha aldeá á Televisión de Galicia.
Cando os axentes intentaban acceder ao interior na casa da anciá, estes foron recibidos polo seu fillo que lles comunicou a súa preocupación porque levaba varios días sen saber dela. Ante o forte cheiro que saía da vivenda, a Policía procedeu a entrar e atopouse co corpo da muller en avanzado estado de descomposición.
O home convivira co cadáver da súa nai durante un mes e asegurou que non se dera conta.
Segundo os testemuños dos veciños, o home "andaba enfermo" e facía anos que non o vían.
No primeiro exame do cadáver non se apreciaron signos de violencia, polo que se trataría dunha morte natural. Polo momento, ata os resultados definitivos da autopsia, a Garda Civil non abriu ningunha investigación.
