El tiempo
viernes. 01.07.2022
El tiempo

As vítimas do Alvia convocan unha concentración para esixir o cesamento de Cortabitarte

Andrés Cortabitarte. AEP
Andrés Cortabitarte. AEP

O exdirector de seguridade de Adif comparecerá este mércores na comisión de investigación sobre o accidente aberta no Congreso

A Plataforma Vítimas Alvia 04155 concentrarase este mércores na Praza das Cortes, fronte ao Congreso dos Deputados, coincidindo coa comparecencia na comisión de investigación do accidente de dous dos exresponsables de Adif e Renfe investigados na causa xudicial por supostamente incumprir a normativa de seguridade ferroviaria. 

Aínda que o exdirector de seguridade de Renfe, Antonio Lanchares, dimitiu o pasado mes de setembro, o que fose o seu homólogo en Adif, Andrés Cortabitarte, aínda ocupa un posto de responsabilidade e de libre designación en Adif, o cal para as vítimas é "intolerable". 

"Esiximos unha vez máis ao ministro e á presidenta de Adif o seu cesamento inmediato. Foi o responsable de desconectar o sistema de seguridade ERTMS que evitase o accidente, porque xeraba atrasos", subliña a asociación nun comunicado remitido aos medios de comunicación. 

Ademais, pide ao ministro "que cumpra os seus compromisos e cre unha comisión de investigación técnica, seguindo a petición da Comisión Europea e a recomendación da Axencia Ferroviaria Europea".

ADIF REXEITA PRONUNCIARSE. Precisamente este luns, en Ourense, o director xeral de Construción de Adif, Juan Pablo Villanueva, evitou na súa visita ás obras da liña de alta velocidade pronunciarse sobre Andrés Cortabitarte, imputado ao que o xuíz atribúe 80 homicidios e 144 delitos de lesións por imprudencia profesional grave. 

Na mesma situación que el se atopan Lanchares, outro responsable de Adif, tres técnicos de Ineco e o maquinista, que aquel día circulaba cun exceso de velocidade tras recibir unha chamada do interventor xusto antes dunha curva sen ERTMS na que había que reducir de 200 a 80 quilómetros por hora. 

As vítimas do Alvia convocan unha concentración para esixir o...
comentarios