O aeroporto de Peinador contará entre o 1 de agosto e o 15 de setembro con dez conexións semanais coas illas de Tenerife e Gran Canaria a través da aeroliña Binter.
Segundo detallou a compañía aérea nun comunicado, os pasaxeiros poderán voar de Vigo a Tenerife os martes e xoves ás 11.15 e ás 11.00 horas e o regreso terá lugar ás 15.15 e ás 15.00 horas, respectivamente. A saída dos sábados realizarase ás 7.00 horas e, o voo da illa á cidade olívica, ás 11.00 horas.
Mentres, a conexión entre Vigo e Gran Canaria realizarase os mércores e os domingos ás 11.00 horas e o regreso terá lugar ás 15.00 horas.
Ademais, a compañía facilitará dun modo gratuíto o enlace destas rutas nacionais coas interinsulares co obxectivo de que os prezos dos billetes sexan os mesmos para cada unha das illas.
