A xuíza de Madrid que citara como investigados a tres deputados de Podemos por atentado á autoridade durante as protestas dos traballadores de Alcoa o pasado 28 de marzo deixou sen efecto esas citacións ao comprobar que están aforados ante o Supremo.
A titular do xulgado de instrución número 25 de Madrid imputara a Rafael Mayoral e os galegos Antón Gómez Reino e Yolanda Díaz (Galicia en Común) pola súa participación nesa manifestación xunto ao Congreso dos Deputados na que cargou a Policía.
De feito, a xuíza citou a Mayoral a pasada semana, pero o deputado negouse a ir por considerar irregular o procedemento.
Ao tratarse de aforados, os tres parlamentarios só poden ser investigados polo Tribunal Supremo.
A Policía identificounos a eles e á entón parlamentaria Ángela Rodríguez, Pam, e denunciounos por arengar aos concentrados a que saltasen o valado policial e incluso por empuxar a policías.
