A Xunta de Galicia confirmou este mércores que concedeu xa as 15 primeiras axudas, por valor total de 412.635 euros, a veciños afectados pola explosión dun almacén clandestino de material pirotécnico na parroquia de Paramos, en Tui, o pasado 23 de maio.
Así o avanzaron o director xeral do Instituto Galego de Vivenda e Solo (IGVS), Heriberto García, e o delegado territorial da Xunta en Pontevedra, José Manuel Cores Tourís, que este mércores mantiveron unha reunión co alcalde tudense, Carlos Vázquez Padín.
Segundo explicou o responsable do IGVS, a Xunta recibiu 37 solicitudes de axudas, das que se resolveron 15: 8 axudas para a rehabilitación de vivendas por valor de 381.285 euros, e 7 axudas para aluguer por valor de 31.350 euros.
"Os afectados que teñen a solicitude aprobada só teñen que pedir o pago anticipado da axuda para recibir o diñeiro e poder acometer as reformas necesarias", indicou Heriberto García, quen confirmou que, das 8 solicitudes de subvención para danos en vivendas, sete reclamaron xa o anticipo "polo que en próximos días recibirán xa o ingreso".
Heriberto García: Os afectados que teñen a solicitude aprobada só teñen que pedir o pago anticipado da axuda para recibir o diñeiro e poder acometer as reformas necesarias
A convocatoria de axudas da Xunta para os veciños afectados por este suceso inclúe, ademais de axudas para aluguer ou para reforma de vivendas, subvencións para reposición de bens domésticos ou para transportes.
COLABORACIÓN DOUTRAS ADMINISTRACIÓNS. Pola súa banda, o delegado territorial do Goberno galego recalcou a necesidade de que tamén se impliquen as administracións provincial e estatal para que os veciños de Paramos poidan volver á normalidade, e lamentou que "volve suceder o que xa pasou en relación coas axudas polos incendios do pasado mes de outubro".
Cores Tourís sinalou á Deputación de Pontevedra, á que reclamou que colabore no rebo da zona, porque ten maquinaria e pode facilitar ese labor, "esencial para acometer a reconstrución".
Os técnicos do IGVS, sinalaron desde a Xunta, xa realizaron 131 visitas a vivendas da zona afectada pola explosión, para avaliar os danos sufridos polas edificacións.
Por outra banda, o alcalde de Tui confirmou que se están realizando labores de retirada de amianto na zona, e que se espera a colaboración doutras administracións nas tarefas de rebo. Así mesmo, indicou que o Concello está pendente do que determine o xulgado sobre clausúraa das instalacións da pirotecnia La Gallega en Baldráns (cuxo dono está en prisión pola explosión de Pairamos), porque alí "a Garda Civil depositou material atopado noutros lugares".
