A Xunta decidiu intervir a residencia de anciáns El Pinar, en Culleredo, tras detectarse nun día 28 contaxios de coronavirus, correspondentes con 21 usuarios e 7 traballadores.
A través dun comunicado, as consellerías de Sanidade e Política Social informaron este domingo desa decisión e aseguraron que busca "garantir a calidade asistencial e a correcta protección da saúde" tanto dos residentes como dos empregados.
Ademais, profesionais do Sergas desprazáronse ao xeriátrico para realizar un seguimento médico "constante" dos usuarios, para "supervisar a correcta aplicación dos protocolos" aprobados pola Xunta e para "velar pola continuidade dunha atención sociosanitaria adecuada".
A residencia El Pinar é a terceira que o Goberno galego decide intervir desde a entrada da comunidade na chamada nova normalidade. As outras son centro de DomusVi en Outeiro de Rei, que este domingo contabiliza 134 usuarios e 24 traballadores contaxiados, e o do Incio, que mantén 58 internos e 35 empregados infectados.
