Adif abriu unha investigación para aclarar a caída de dous vagóns do tren de mercancías descarrilado o pasado 28 de xullo en Carballeda de Valdeorras ao río Sil.
Despois de que transcendese unhas imaxes nas que se pode ver como un dos vagóns cae ao río desde a zona na que descarrilara o convoi e outro que queda suspendido, fontes de Adif consultadas por Europa Press informaron de que o ente público abriu unha investigación para coñecer os detalles deste suceso.
Deste xeito, estas fontes sinalaron que Adif analizará todas as actuacións efectuadas en relación a estes feitos e "depurará, no seu caso, responsabilidades". Ademais, indicaron que se traballa na retirada dos dous vagóns da zona e na restauración da contorna "o máis axiña posible".
#ADIF VIERTE AL RÍO SIL LOS VAGONES DESCARRILADOS
— MaltratodaPaisaxe (@MaltratoPaisaxe) August 3, 2020
Vídeo 1
Carballeda (#Ourense) @mariaduran1987 @pgsarria @lavozdegalicia @ELPAISGalicia @abc_es @larazon_es @arboresdalimia @LaRegion @greenpeace_esp @ADEGAgz @historiaGAL @xeografo @GFAugasGalicia @LaVanguardia @perezalberti47 pic.twitter.com/Eq282BhWBZ
En concreto, o tren que circulaba pola liña Monforte-Ponferrada sufriu un descarrilamento na tarde do pasado 28 de xullo ao seu paso por Carballeda de Valdeorras. Aínda que non se produciron danos persoais, o sinistro obrigou a cortar a vía ao quedar os vagóns envorcados na zona.
A XUNTA PIDE EXPLICACIóNS. A Xunta dirixiuse na mañá deste martes a Adif para pedirlle explicacións pola caída dos vagóns ao río Sil.
En concreto, a Consellería de Infraestruturas e Mobilidade, a través da Dirección Xeral de Mobilidade, trasladoulle á empresa pública a súa preocupación pola situación xerada.
Ademais, segundo informou o departamento que dirixe Ethel Vázquez, a Xunta pediu información precisa sobre o protocolo de actuacións que se está levando a cabo para a retirada dos vagóns, co obxectivo de que se retiren canto antes e que se minimicen as afeccións á contorna.
CRÍTICAS DO BNG. Precisamente, despois de que transcendese a caída dos vagóns ao río, o deputado do BNG, Néstor Rego, rexistrou unha iniciativa parlamentaria no Congreso a través da que pide a retirada inmediata destes para proceder a reparar "o dano ambiental causado".
Ademais, pide que se lle comuniquen os feitos á Fiscalía. O parlamentario nacionalista demandou ao Goberno investigar os motivos que levaron a Adif "a tomar a decisión de tirar os vagóns descarrilados ao río en lugar de retiralos de forma adecuada e reparar os danos causados na contorna, tal e como estipula a normativa". "Non se pode tolerar que unha empresa pública sexa a primeira en incumprir a normativa sobre a xestión de residuos e reparación dos danos causados á contorna", sinalou o deputado.
Ademais, considerou "inconcibible" que Adif-Renfe tomase a decisión "consciente" de tirar ao río, "xa bastante contaminado", os vagóns" en lugar de facer "o necesario para retiralos tal e como correspondería". "Adif debe dar exemplo e o Goberno español responsabilizarse de que a xestión pública sexa adecuada á lexislación ambiental", indicou.
Os nacionalistas, así mesmo, consideran que é necesario que se lle comunique á Fiscalía para que investigue esta conduta que podería ser constitutiva dun delito contra o medio ambiente e se depuren responsabilidades. "Este incidente non pode quedar impune", sinala.
O PSDEG ESIXE A RETIRADA INMEDIATA. Noutro comunicado remitido aos medios, o PSdeG esixiu a Adif que retire de forma inmediata o vagón caído ao río e proceda á restitución dos danos ambientais causados. Ademais, reclamou que se avalíe a situación dos outros vagóns que permanecen á beira da vía do tren e que se retiren "tomando todas as medidas de seguridade ambiental necesarias". "é incompresible", sinalaron os socialistas galegos, que critican que a recuperación dos vagóns non leve a cabo seguindo procedementos que non impliquen danos para o medio e para a seguridade ferroviaria.
"Agora o prioritario é levar a cabo a recuperación do vagón caído ao río Sil, restaurar os danos provocados nas augas e no ecosistema e retirar canto antes o resto dos vagóns que se entran xunto á vía", indicou.
Ademais, noutro comunicado, Galicia en Común informou de que se puxo en contacto con Adif e co Ministerio de Transportes para pedirlles explicacións en relación aos vagóns envorcados ao río e asegurou que se manterán "vixiantes" para que a empresa pública cumpra os "compromisos adquiridos", que pasan por investigar o ocorrido.
"QUEN CONTAMINA, PAGA". Por outra banda, nun comunicado remitido aos medios, a entidade ecoloxista Amigos da Terra requiriu á Confederación Hidrográfica e á Consellería de Medio Ambiente que aplique á empresa responsable da vertedura o principio de quen "contamina, paga" que, segundo indica, se regula na Lei de responsabilidade ambiental.
Para a entidade, os danos causados ao río "non poden quedar impunes" e as administracións teñen que adoptar as medidas preventivas apropiadas, recollidas na Lei de Augas e na Lei de responsabilidade ambiental e cuxa sanción, segundo indican, podería carrexar multas de ata dous millóns de euros.
Os populares explican que o propio Administrador de Infraestruturas Ferroviarias prevía restablecer o tráfico ferroviario en dous ou tres días despois da retirada dos vagóns das vías, pero o pasado día 2 anunciou que o servizo non sería restablecido ata o día 17 -case tres semanas despois-, alegando dificultades nos labores técnicos de retirada dos vagóns que poderían derivar na caída dalgúns dos mesmos ao río Sil.