O conselleiro de Sanidade, Jesús Vázquez Almuiña, remitiu un escrito ao ministro do ramo, Salvador Illa, acompañado dun informe no que se insta a modificar a Lei de Medidas Especiais en materia de saúde pública para que as comunidades poidan adoptar medidas fronte ao Covid-19, coas "maiores garantías xurídicas" e sen ter que recorrer ao estado de alarma.
Galicia solicitou ao Goberno central reformar as medidas lexislativas para loitar contra a pandemia de covid-19, entre as que figuran establecer "cordóns sanitarios" ou restrinxir o dereito de reunión co fin de evitar contaxios.
A Xunta propón facer cambios normativos que introduzan medidas suficientes para previr a propagación do coronavirus e "evitar ter que percorrer continuamente ao denominado estado de alarma", que permite ao Goberno central restrinxir temporalmente a mobilidade da poboación.
"As comunidades autónomas necesitan ferramentas lexislativas que vaian máis aló das autorizacións xudiciais, e que lles acheguen seguridade xurídica á hora de establecer medidas ou restricións en cada unha das autonomías", indica o conselleiro.
Así, suxire que a nova lexislación permita ás autoridades "a posibilidade de adoptar medidas xerais" tales como "cordóns sanitarios, ou posible confinamento da poboación ou a opción de limitar o dereito de reunión".
O representante da Xunta, que achega as suxestións cun informe xurídico, indica que segundo algúns xuristas, "no caso de que estas medidas conten con carácter xeral, non estarían suxeitas á ratificación xudicial para poder ser adoptadas".
Subliña, ademais, que a modificación lexislativa debería "definir cales serían as competencias estatais e autonómicas" en casos de que a situación "afecte a máis dunha comunidade", como é o caso dos desprazamentos de persoas entre comunidades autónomas.
Así mesmo, en aras de previr e evitar a propagación da pandemia de covid-19 nos próximos meses e de establecer medidas de coordinación, Almuiña propone unha reunión monográfica para estudar "medidas xerais" sobre o retorno dos alumnos ás aulas.
