O conselleiro de Cultura, Román Rodríguez, mantivo este mércores un encontro cos principais operadores de turismo galegos para trasladarlles as medidas que a Xunta impulsará para favorecer a recuperación do sector turístico tras a crise do coronavirus.
Así, Rodríguez explicoulles que o Goberno galego ten en planificación unha investimento de máis de 25 millóns de euros para, entre outras medidas, deseñar accións de promoción unha vez termine a crise, conceder axudas directas ao sector ou desenvolver novos produtos turísticos.
O conselleiro recompilou as achegas dos principais operadores de turismo galegos co obxectivo coñecer as súas necesidades e telas en conta á hora de pór en marcha as distintas iniciativas de recuperación.
Neste sentido, incidiu na necesidade de manter "unha intensa colaboración público-privada" cando conclúa a crise sanitaria, impulsando medidas de reactivación no curto, medio e longo prazo.
O Centro Superior de Hostalería de Galicia ofrece cursos cos que aspira a chegar a máis de 2.000 persoas
PRIMEIRAS ACCIÓNS. Entre as iniciativas xa postas en marcha por parte do Goberno galego no campo turístico destaca o plan de teleformación a través do Centro Superior de Hostalería de Galicia (CSHG), que aspira a chegar a máis de 2.000 persoas.
Esta acción ten como obxectivo mellorar as competencias dos profesionais do sector a través dunha decena de relatorios interactivos sobre aspectos como a xestión dixital, a comunicación e a mercadotecnia en liña.
Os dous primeiros cursos celebrados xa esgotaron as súas prazas e este mes están programados outros oito que permitirán proporcionar ás participantes ferramentas prácticas de xestión para dirixir un establecemento de restauración incrementando a calidade dos servizos prestados a turistas e cidadáns.
