O presidente da Xunta, Alberto Núñez Feijóo, insistiu este domingo en pedir "reformas legais" en materia sanitaria que habiliten o Goberno central a poder restrinxir a mobilidade nun determinado territorio de España que presente un rebrote de Covid-19.
Na rolda de prensa posterior á décimo cuarta videoconferencia co xefe do Executivo estatal, Pedro Sánchez, e o resto de líderes autonómicos, Feijóo mostrou a súa "preocupación" coa reapertura o 21 de xuño das fronteiras do espazo Schengen —agás con Portugal— e entre as propias comunidades autónomas, ante a "ausencia" de lexislación sanitaria específica e dun plan único estatal fronte a rebrotes.
"Volvinlle a insistir ao presidente que é imprescindible dotarnos de capacidade legal para actuar en caso de rebrotes localizados. Imaxinemos un rebrote nun territorio, un municipio, unha cidade. ¿Non será máis lóxico, máis responsable e máis útil para poder acoutar e regular a circulación nestas zonas en lugar de non facer nada para impedir a propagación do virus?", preguntouse.
Por iso, referiuse á Lei Orgánica de Saúde Pública e suxeriu "engadir un artigo" que permita ao Executivo adoptar estas medidas. "Non deberiamos iniciar períodos de vacacións parlamentarias sen facer esa modificación legal", subliñou o popular.
E é que, a horas de que Galicia se converta na primeira comunidade en abandonar o estado de alarma e en entrar na nova normalidade, Feijóo explicou que a Xunta "non pode, por ausencia legal, pechar localidades" ante un novo brote de coronavirus. Ante iso, dixo, o único que poden facer é "pedirlle a un xuíz que habilite" este peche.
A horas da saída de Galicia da fase 3, rexeita recuperar a normalidade "de forma abrupta"
No caso da educación, o presidente galego apuntou que ao ministerio lle faltou concreción para un retorno ás aulas seguro e pediu que o curso sexa no posible similar aos anteriores e que se coide o evitar "rupturas emocionais".
Sobre o caso galego, e no que toca aos máis pequenos, fixo fincapé en que "polas propias características do lugar" non é o mesmo ter os nenos en parques abertos, algo posible desde este luns, que en escolas infantís nas que os espazos son pechados. É ademais o que observaron pediatras e infectólogos, dixo. "Esta é a dinámica e o procedemento que consideramos máis útil", dixo, e máxime nun momento no que os menores han de reactivar "os seus comportamentos sociais".
"Abrir todo á vez parécenos moi arriscado", defendeu, e resaltou que hai protocolos de limitación de aforamento en exteriores e interiores en xeral e que por exemplo tamén se permitiron antes as terrazas que consumir no interior dos locais. A súa intención é que Galicia "recobre a normalidade de forma gradual e, en ningún caso, de forma abrupta".
Neste punto, a horas de abandonar o estado de alarma, Feijóo asegurou que se Galicia sae do plan de desescalada por fases é polo "mérito e a responsabilidade de todos os galegos". Estendeu os agradecementos ao persoal sanitario e incluso ao Goberno de Pedro Sánchez, tras destacar "a colaboración e o diálogo que houbo na maioría dos momentos". Asegurou, ademais, que intentou atinar nas súas decisións, aínda que haxa acertos e "erros", estes últimos nalgúns casos "lóxicos"; e diferenzas entre uns e outros, "que seguramente son inevitables".
Agradece ao Goberno "a colaboración e o diálogo que houbo na maioría de momentos"
O que si solicitou, baixo a súa óptica, é que non se cometan máis. "O risco, ata a vacina, será evidente", subliñou nese sentido, e por iso urxiu "un criterio sanitario" ante brotes que poidan ocorrer e que os expertos sinalan que se van producir "máis cedo que tarde".
E, entre outros aspectos, Feijóo volveu demandar ao Goberno que se elimine a taxa de reposición en sanidade e servizos sociais para diminuír a inestabilidade e a temporalidade e poder dar vía libre a unha oposición con máis de 3.500 prazas que permitirían reforzar primaria, pediatría e medicalizar as residencias de maiores.
Reclamou tamén reducir o Ive das máscaras, así como os impostos ao sector turismo, e unha solución para a viabilidade da planta de Alcoa, "que non pode irse" de San Cibrao. Ao seu xuízo, pasaría por un prezo estable da electricidade, algo que asegurou que depende exclusivamente do Goberno central.
