A Xunta reforzará os centros educativos con 543 docentes de apoio

A acción enmárcase dentro da iniciativa ARCO, impulsada pola Consellería de Educación
Aula vacía. ARQUIVO.
photo_camera Aula vacía. ARQUIVO.

A Consellería de Educación reforzará o persoal dos centros educativos con 543 docentes de apoio (221 para Primaria e 322 para ESO) contratados a media xornada para o desenvolvemento da iniciativa de Apoio, Reforzo de Competencias e Orientación dirixidas a centros públicos de primaria e secundaria (ARCO), que contará cun orzamento de 10,5 millóns de euros para o curso 2020/2021. 

O departamento educativo da Xunta publica este venres a convocatoria, cuxo prazo de presentación estará aberto desde o 7 de setembro ata o 25 do mesmo mes, así como o de Contratos-Programa, que se poderán solicitar desde o 15 de setembro ata o 6 de outubro. 

A iniciativa ARCO, que pode ser complementaria cos contratos-programa, é un instrumento de apoio aos centros para que, dentro da súa autonomía, poidan organizar os recursos de forma que se facilite ao alumnado o logro dos obxectivos e a consecución das competencias crave. 

Por primeira vez, e en resposta ás necesidades de reforzo derivadas da suspensión das clases presenciais nos últimos meses do curso, o profesorado contratado ao amparo desta iniciativa incorporarase no primeiro trimestre (víñao facendo no segundo) e permanecerá igualmente ata final de curso. 

As accións de ARCO van dirixidas a apoiar o alumnado para a mellora do rendemento académico, implicando ao grupo de clase nas actividades de reforzo, co fin de conseguir o máximo desenvolvemento emocional, intelectual e social do alumnado. Ademais, este ano, como novidade, buscarase desenvolver modelos curriculares máis competenciais, interdisciplinares e participativos, así como impulsar a aplicación de cambios organizativos e metodológicos que permitan o seguimento personalizado das súas competencias. 

Este programa, dirixido aos centros públicos, consta de 3 liñas de actuación que desenvolverán axustes educativos dentro da aula común, co obxecto de garantir a máxima inclusión, favorecendo a participación no grupo-clase e a consecución do máximo desenvolvemento emocional, intelectual, social e profesional de todo o alumnado. A liña 1 inclúe por primeira vez este ano ao alumnado de 4º de Primaria, ademais da o de 5º e 6º desta mesma etapa, a 2 ao de 1º de ESO e a 3 ao alumnado de 4º de ESO. 

Todas as liñas desenvolveranse dentro do horario lectivo e mediante apoios a través do uso de metodoloxías activas e participativas, así como a aplicación de medidas organizativas ao alumnado obxecto da liña. 


CRÍTICAS 

Por mor deste anuncio, o sindicato CIG emitiu un comunicado para criticar esta convocatoria que, recordou, abarcará a docentes "con contrato a media xornada, limitada implantación nunha minoría de centros educativos públicos e só para unha parte do alumnado". 

Con iso, a CIG opúxose a que Educación poña en marcha estas medidas en lugar da "necesario investimento en materia de persoal". "Se o sindicato xa fai estas críticas nun curso común, os motivos para redobrar as queixas sindicais son maiores dada a situación da pandemia e a negativa da Xunta de Feijóo a incrementar docentes, reducir cocientes e mellorar as condicións de seguridade nos nosos colexios e institutos", explicaron. 

En todo caso, estes reforzos, en Primaria, apuntou a CIG, "abarcan o 38% dos 581 CEIP e CEP" Galicia, e en cada centro seleccionado "só contarase cun mestre a media xornada para atender ao alumnado dos tres últimos cursos". Tamén criticaron a cobertura que este programa terá en Secundaria. 


REFORZO DE BIBLIOTECAS 

Por outra banda, a Xunta informou este venres da apertura dunha convocatoria extraordinaria das axudas para a adquisición de novidades editoriais en galego e para mellorar as coleccións bibliográficas e axencias públicas de lectura integradas na Rede de Bibliotecas de Galicia, cun montante de 300.000 euros. Esta partida súmase á convocada no principio do ano, xa resolta, da que se beneficiaron 186 concellos, cun investimento de 550.000 euros. 

Esta convocatoria extraordinaria enmárcase nos compromisos do Plan de Reactivación dos sectores cultural e turístico para reforzar o apoio ao sector editorial galego e supón un incremento do 54% no apoio habitual neste ámbito.

Comentarios