O Goberno galego resolveu este xoves a convocatoria das 30 casas do maior que no pasado mes de xullo impulsou para proporcionar atención profesional durante oito horas ao día a persoas maiores de 60 anos en situación de dependencia en concellos de menos de 5.000 habitantes.
Ante a aceptación da iniciativa, o Goberno ampliará a oferta destas casas para maiores que "replican" o modelo das casas niño, ata chegar a 60 antes de concluír a lexislatura.
As 30 primeiras casas instalaranse en 25 concellos de menos de 5.000 habitantes e darán asistencia a 150 maiores con dependencia, segundo o proxecto.
Os municipios beneficiados serán na provincia da Coruña os de Laxe, Vilarmaior, Aranga, Trazo, Santiso e Monfero, e na de Lugo os concellos de Portomarín, Cervantes, O Páramo e As Nogais.
Na provincia de Pontevedra serán beneficiados os de Arbo e Pazos de Borbén e para rematar, na de Ourense, que contará con máis da metade, haberá casas do maior nas localidades de Sarreaus, Rairiz de Veiga, Os Blancos, Punxín, Piñor, A Teixeira, Xunqueira de Ambía, A Veiga, A Gudiña, Laza, Cenlle, Xunqueira de Espadanedo e Castrelo de Miño.
En total, a Xunta prevé investir nestes centros máis dun millón de euros, dos cales, 400.000 euros en adecuar as casas e os 600.000 euros restantes no desenvolvemento da súa actividade de acollida, coa intención de que cada coidador perciba unha nómina de 20.000 euros anuais.
