A Xunta anunciou este martes a apertura dun expediente sancionador ao Concello de Vigo tras detectar "reiteradas deficiencias" nos controis de auga realizados polo laboratorio municipal na billa do consumidor e "incumprimentos na calidade" non comunicados á autoridade sanitaria.
O director xeral de Saúde Pública, Andrés Paz-Ares, confirmou este extremo nunha rolda de prensa, na que tamén estiveron presentes o delegado territorial do Goberno galego en Vigo, Ignacio López-Chaves, e a xefa territorial de Sanidade, Ángeles Feijóo.
Paz-Ares explicou que as inspeccións levadas a cabo por técnicos da Xunta "poñen de manifesto o incumprimento reiterado en Vigo da normativa que establece os criterios sanitarios de calidade da auga de consumo" durante os anos 2016 e 2017, polo que se requiriu ao Concello a adopción de medidas correctoras.
En total, a administración autonómica propón unha sanción de 21.500 euros
Na comunicación remitida ao Consistorio, á marxe da incoación do expediente sancionador, acórdase a suspensión temporal do funcionamento do laboratorio municipal para a realización de análise de auga para consumo "ou de calquera actividade para a que se lle reclame a posesión de certificación ou acreditación", xa que, dixo, carece delas
En concreto, abundou o director xeral de Saúde Pública, nas análises realizadas polo laboratorio na billa do consumidor en 2016 e 2017 detectáronse ata vinte e catro casos de auga como non apta e outros 31 de apta con non conformidade. Ningún destes "incumprimentos" foron confirmados cunha segunda analítica nin se trasladaron á autoridade competente ou se incorporaron ao Sistema de Información Nacional de Auga de Consumo ( Sinac), insistiu.
Andrés Paz-Ares apuntou que "todas as analíticas de autocontrol" da auga en Vigo efectúaas a empresa concesionaria do servizo, Aqualia, aínda que hai análises específicas na billa do consumidor que realiza o laboratorio municipal", e neles detectáronse estes incumprimentos.
Así, a Xefatura Territorial da Consellería de Sanidade de Pontevedra determinou unha cuantificación provisional da sanción nun importe aproximado de 21.500 euros por "catro infraccións administrativas, tres delas tipificadas de carácter grave e outra de carácter leve".
Proponse unha sanción de 6.010 euros pola ausencia de certificación ou acreditación do laboratorio municipal; outros 6.010 euros pola falta de determinación de metais nas analíticas de control; 8.000 euros pola ausencia de notificación á autoridade sanitaria dos supostos constatados de auga non apta; e 1.500 euros por non fornecer datos ao Sinac.
O Concello conta cun prazo de quince días para presentar as súas alegacións.
