O xurado popular declarou culpables por unanimidade aos dous acusados do asasinato de Yurissa A., unha cidadá dominicana residente en Ribeira que faleceu de xeito "lento e agónico" en xuño de 2015 a consecuencia dunha trintena de feridas producidas cun obxecto punzante.
Despois de manter as súas deliberacións durante un día e medio, tras un xuízo celebrado ao longo dunha semana en Santiago, os membros do xurado consideran probado que V. e M. deron morte de xeito conxunto a Yurissa e, a continuación, abandonaron o seu cadáver nunha leira da Pobra do Caramiñal, localidade na que residían os acusados, que eran parella no momento dos feitos. Ademais, tamén determinan que o delito de asasinato se produciu co agravante de ensañamiento.
As defensas anunciaron que presentarán senllos recursos de apelación para os acusados, que se enfrontan a peticións de penas de 20 anos de prisión por parte do Ministerio Público e de 25 por parte da acusación particular que, a diferenza da Fiscalía, si reclama que V. e M. ingresen no cárcere de xeito inmediato.
