A portavoz popular no Concello de Vigo, Elena Muñoz, anunciou este xoves que se aceptou a personación do PP como acusación particular no caso O Marisquiño e que buscarán que “os 467 feridos, as súas familias e os vigueses saiban a verdade”.
A líder dos populares fixo este anuncio durante a celebración dun almorzo informativo celebrado na sede local do partido, no que realizou un “balance” do 2018 apuntando, con vistas ao ano que vén, que o seu grupo é a “única alternativa real” de goberno na cidade.
Elena Muñoz subliñou que 2018 será recordado por un “dos peores accidentes da historia de Vigo” e lamentou a falta de interese do alcalde porque se saiba a verdade. “Quen non ten nada que ocultar non ten nada que temer”, dixo. “O que autorizou o concerto nun paseo en malas condicións foi o alcalde”, recordou, indicando que deste caso “aínda queda moito por saber”.
Elena Muñoz sinalou que o ano que conclúe é “o exemplo perfecto” do que foi a lexislatura. Así, cuestionouse por cal é “ese gran proxecto, esa grande obra, unha grande actuación que impulse este goberno municipal durante estes anos”, e puxo como exemplos de actuacións erradas o propio estadio de Balaídos, que supostamente tería que estar terminado en 2017; a Panificadora; o Barrio do Cura; ou a chegada de Ikea. “Son moitas as promesas dun goberno especialista en vender fume”, continuou a portavoz popular, que lamentou que “os datos mostran un Vigo moi distinto".
Fronte a esta forma de gobernar, Muñoz situou ao Partido Popular como “única alternativa posible” e avogou, de cara ás municipais de 2019, por outro modelo de cidade. “Nós defendemos un modelo que permita baixar impostos, permita ter un novo PXOM e que facilite unha administración máis eficiente para que Vigo volva ser unha cidade de facilidades onde a xente queira vivir e investir”, destacou. “Esta cidade necesita un cambio. Traballamos durante anos e ímolo seguir facendo. O ano que comeza ten unhas eleccións municipais importantísimas nas que nada está escrito, por moito que haxa quen trata de dicirlles aos vigueses o que teñen que votar”, concluíu.
